Yau Malumfashi Mun Yi Rashi
Daga Bashir Yahuza Malumfashi
Inna lillahi wa inna ilaihi raji’un!
A ranar yau Asabar, 01-02-1447 (Hijriyya), 26-07-2027 (Miladiyya), Allah ya amshi rayuwar Malam Adamu Ahmad, wanda aka fi sani da laƙanin A.D.A.
Haƙiƙa ADA mutum ne da na sani a matsayin nagartacce, mai zumunci, kodayashe yana cikin fara’a da zaman lafiya da kowa. Ɗan uwa ne a gare ni, kasancewar yana auren ƙanwarmu, Hinde.
Mutum ne mai so da kishin addini. Kafin rasuwarsa, ya yi fama da jinya mai tsawo, amma duk da haka kullum za ka same shi a sahun jam’i, yana kan kujera, a Babban Masallacin Juma’a na Bakin Kasuwar Malumfashi.
A can baya, a shekarun ƙuruciya (1980-1990), za a iya tuna shi a matsayin gwanin ƙwallon ƙafa, shi Gwalkifa ne na sahun farko a Ƙungiyar Ƙwallon Ƙafa ta Golden Stars da ta yi tashe a Malumfashi da kewaye. Haka kuma yana cikin babbar ƙungiyar Ƙaramar Hukumar Malumfashi, Malumfashi United. A lokacin ne ma sunansa ya ƙara fitowa, inda da zarar ya kama ƙwallo cikin gwaninta, za ka ji ‘yan kallo sun ambata: A…D…A.
Muna roƙon ‘yan uwa da abokan arziki da su taya mu addu’a. Allah ya ji ƙan shi da rahama, ya yafe masa kurakuransa. Mu kuma da muka rage, Allah ya kyautata tamu rasuwar, idan lokacinmu ya zo.
AMIN-SUMMA-AMIN
__________
