Ɓarawo Da Alƙali
Wani ɓarawo ne ya saci akuya, sai aka kama shi aka kai shi kotu. Ga yadda ta kwashe, tsakaninsa da alƙali:
Alƙali: Ana tuhumarka da satar akuyoyi uku.
Ɓarawo: Ƙarya ne ranka ya daɗe, akuya ɗaya na sata.
Alƙali: Kada ka raina wa kotu hankali. Ga akuyoyi uku a gaban kotu a matsayin shaida.
Ɓarawo: Ranka ya daɗe uwar na sata, shi ne ’ya’yanta guda biyu suka biyo ta. Ni kuma ba zan iya cewa su koma ba.
Alƙali: Kana raina kotu fa!
Ɓarawo: Ranka ya daɗe, ko kai ne aka sace mahaifiyarka, ka gan ta, ai za ka bi ta.
Alƙali: Gaskiya ne, zan bi ta amma ka fara zuwa kurkuku, a dawo da kai bayan wata biyu.
~~~~~~
Related posts
Yawon Dare
Wasu matasa ne sun dawo daga gidan kallon ƙwallo, sun yi dare. To, dama a lokacin an sa dokar hana fita (curfew). Suna cikin tafiya sai suka haɗu da sojoji. Sai sojojin suka ce kowa za a yi masa bulala daidai lambar da ke bayan rigarsa. Na farko ya sa rigar Chelsea 12-Mikel Obi, aka yi masa bulala 12. Na biyu ya sa rigar 50 Cent, shi ma aka yi masa bulala 50. Tun kafin a zo kan na ukun ya fara kuka da ihu, ana dubawa sai aka ga an rubuta a rigarsa: BABA BUHARI, 2019.
~~~~~~~
Banufe Da Matarsa
Wani Banufe ne Allah Ya jarabce shi da wata fitinannar mata. Ba ta ɗaga masa ƙafa ko kaɗan da fitina. Shi ya sa kullum idan ya fita, sai ya bari sai ta yi barci sannan yake dawowa gida. Wata rana sun yi faɗa da rana, ya fita daga gidan, sai Banufe ya dawo gida tsakiyar dare. Sai ya iske matar tasa a kwance tana sharɓar barci. Ganin haka sai ya ce:“Allah na gode maka, wannan fitinar ta yi barci. “Yana rufe baki sai nan take matar nan ta farka kuma ta maida masa martani da cewa: “Allah kuma Ya tsine wa wanda ya tashe ta ba!”
~~~~~~~
Good
Thanks!
Good
Thanks 👍