Ƙungiyar VDM: Kishin Ƙasa Ko Wuce Makaɗi Da Rawa?
•••••••
A shekaranjiya ne wani hoton Very Dark Man cikin shigar ɗamara irin ta jami’an tsaro ya karaɗe Soshalmidiya. A tare da hoton, wanda na bidiyo ne, an ji shi yana bayyana wasu ƙudurce-ƙudurce na aiwatar da wasu aikace-aikace a faɗin ƙasa.
A yayin da yake magana cikin yanayi irin na shugabanni, VDM ya yi kira ga mabiyansa na gaskiya, da aka fi sani da “Ratels” da su shiga wani gagarumin aikin tsaftace muhalli a duk faɗin jihohi 36 na Najeriya, wanda zai fara daga ranar 29 ga Nuwamba, 2025.
A cewarsa, wannan shiri yana da nufin inganta kishin ƙasa, ƙarfafa aikin hidima ga al’umma, tare da samar da muhalli mai tsafta da lafiya ga ‘yan Najeriya.
Ya jaddada cewa wannan aiki na hidima ne na sa kai, inda ya roƙi matasa, ‘yan kasuwa mata da shugabannin al’umma da su haɗa hannu wajen share tituna, gyara magudanun ruwa da kuma zubar da shara ta hanyar da ta dace.
Abin tambaya a nan shi ne, shin me za a kira wannan yunƙuri nasa? Kishin ƙasa ne da nufin kawo gyara ko kuwa wani shiri ne na kafa wata ƙungiya da za ta yi kafaɗa da kafaɗa da gwamnati?
Wasu rahotanni sun bayyana cewa jami’an tsaro sun kama shi a gidansa da ke Abuja. Wataƙila za su bincika ainihin manufarsa ta ɓullo da wannan tsari.
_______________
