SHIRIN FIM: Furodusa Nafseen Ya Shirya Taron Fitattun ‘Yan Wasa
Furodusan Finafinai Hausa mai tashe a zamanin nan, Jamil Jiddan Nafsin ya shirya gagarumin taron fitattun ‘yan fim na Kannywood.
Furodusa Jamil, wanda kuma marubuci ne, ya bayyana makasudin shirya taron. “Alhamdu lillah, na haɗa taron gabatar da Script ɗin sabon shirin ‘Nafseen International’ da zan ɗauka in sha Allah,” In ji shi.
Taron ya samu halartar manyan ‘yan wasa da jarumai da masana da ƙwararrun a kowanne ɓangare na fim.
“Mun ci mun sha, mun tattauna batutuwa da yawa da suka shafi labarin fim ɗin da tsarin yadda zan ɗauke shi,” a cewar furodusan.
Wasu daga cikin manyan ‘yan wasan da suka halarta sun haɗa da Hamisu Iyan-tama, Ado Ahmad Gidan Dabino, Wassh Waziri Hong da Mika’il Hassan Gidigo.
Wasu daga ƙwararrun masana harkar fim da suka halarta kuwa sun haɗa da Abdullahi Hassan Yarima, Ameen M. Auwal, Abba John, Usman Solo da Ahmad Gulu.
Sai dai Furodusa Jamil, wanda shi zai ba da umurni a shirin, bai bayyana sunan sabon fim ɗin da yake shirin ɗauka ba, sai nan gaba kaɗan.
