BANKWANA DA GWANI
Ƙasidar Ta’aziyyar Sheikh Idris Abdul’aziz
Daga Bashir Yahuza Malumfashi
__________
Yau kwana uku ke nan da rasuwar fitaccen malamin Musulunci, Sheikh (Dokta) Idris Abdul’aziz Dutsen Tanshi Bauchi. Domin alhini da ta’aziyya, Bashir Yahuza Malumfashi ya rubuta tare da rera baitoci 31 a wannan ƙasida da ya sanya wa suna: BANKWANA DA GWANI. Muna ƙara addu’ar Allah Ya ji ƙan Malam da rahama, Amin. Haka kuma ga mai son saurere da kallon bidiyon wannan waƙa, sai ya leƙa shafin Taskar Gizago na YouTube, a wannan liƙau:
https://youtu.be/EKFt-TyaEsE?si=hsqc9BDQdwOv5Agh
____________
“Inna lillahi” kalami babba.
“Wa inna ilaihi” Allah Rabba.
“Raji’una” a rana babba.
Can muka dosa, gida ne babba.
Ba rabo da gwani ba,
Maida kamarsa ba a samu ba.
Rayuwa zango ce.
Kowa ajali ne babba.
Wani shi yai sammako.
Wani ko da rana babba.
Na tuna bawan Allah,
Idrisu Faƙihi ne babba.
Lallai ka cika gwarzo,
Mujaddadin sunna babba.
Na Dutsen Tanshi,
A Bauchi gari ne babba.
Yau ya cin ma sa’i.
Daren Juma’a rana babba.
Mu duba kwanan wata.
Ranar tafiyar Malam babba.
Bayan watan Azumi ne.
Wagga ibada ce babba.
Mun shigo watan Shawwalu.
Shagalin Sallah yaro har babba.
Shidda ne daidai ga wata,
Ya warke jinya babba.
Huɗu ne ga watan Afirilu,
Watan Nasara ku duba.
Allahu Ya amshi abinSa.
Sai mu gode Sarki Rabba.
Malam da halayensa,
Abin koyi ne maza duba.
Lallai Malam ya yo dace.
Aikin Allah ba ya tababa.
Ina ka fito? Karatu.
Ina ka nufa? Gidan ilimi babba.
Malam ya yi karatu.
Ya shayar da karatu babba.
Malam akwai tauhidi.
Wannan shi ne jigo babba.
Malam ba ya wargi.
Da littafin Allah babba.
Ya ƙaunaci Manzo,
Abban Fatima bango babba.
Malam shi ba ya ƙarya.
Ba ya kwaɗayi ƙarami ko babba.
Maganarsa guda ɗaya tilo:
A yi riƙo da igiya babba.
Tafiyar Malam bai sauri ba.
Muna tafe ba jinkiri ba.
Allah muna roƙon Ka,
Ka haskaka ruhin baba.
Ka saka shi a Firdausi.
Malam ka ji makwanci babba.
Ni ne nai yo ta’aziyya,
Bashiru Gizago ɗan baba.
Baitoci sun cika thirty.
Ƙaro guda ɗaya babba.
Jama’a sai mu ɗau haƙuri.
Mu yo koyi da halin baba.
Idirisa bawan Allah.
Dutse na Tanshi Malam babba.
_______________
© Bashir Yahuza Malumfashi,
Juma’a 06-10-1446 (Hijiriyya),
04-04-2025 (Miladiyya).
