Malam Ɗan Masani
__________
Ƙasida ta musamman daga Bashir Yahuza Malumfashi (Fasihin Galadiman Katsina-I), domin taya murna ga Malam Zubairu Idris Abdulra’uf, Ɗan Masanin Birnin Gwari, bisa cikarsa shekara 60 a duniya da kuma kammala aikin gwamnati.
__________
1
Salamun alaikum ‘yan uwa nai sallama,
Na zo da baitoci gare ku da himma.
2
Allah muke roƙo ya yi mana rahama.
Ya tsare mu sharrin rayuwa algunguma.
3
Ya daɗo salati gungumeme da sallama,
Gun Musɗafa Manzonmu mai Islama.
4
Yau Laraba, mun shagaltu da hidima
Murna ta gwarzo mai hagu mai dama
5
Malam Zubairu ka tsallake ƙorama,
Mun shaida jarumtarka tare da girma.
6
Sittin ka sauke shekarunka da gama,
Ka shuka alheri tuli fiye goma.
7
Muryarka tai yo sansani ba homa,
Ta saita ruhin duniyar bil’adama.
8
A aikin rediyo tabbas ba ka da dama,
Kai ka iya kuma ka iyar gogarma.
9
Ka sam yabo ba ƙwauro ka kuma,
Ka girbi alheri gida da dawa sama.
10
Ka zam fitillar haskake duka gunduma,
Ka sa matasa taitayinsu cikin tsuma.
11
Murya ta ‘yanci kai ne zuma,
Kai haziƙi ne mai azanci da hikima.
12
Ɗan Masani na kira ka da girma,
Kai garkuwa ne ko a filin noma.
13
Allah muke roƙo tuli mai rahama,
Rayuwarka ka ƙarƙare babu gararuma.
14
Nan zan tsaya baiti guda ɗan goma,
Ga ɗoriya ta biyar ciki na tsoma.
15
Ni ne Bashiru ɗan Yahuza da hikima,
Fasihi sarauta ce a gidan Galadima.
__________
© Bashir Yahuza Malumfashi,
Laraba, 06-03-1447 (Hijiriyya)
19-08-2026 (Miladiyya)
__________
