Kwamishina Ɗahiru Ya Harzuƙa Maryam Jan Kunne
Daga Bashir Yahuza Malumfashi
__________
Hadinar Gwamnan Jihar Kano, tsohuwar ‘yar fim, Maryam Abubakar Jan Kunne ta zargi Kwamishinan Ruwa da Muhalli na Jihar Kano, Dakta Ɗahiru da ƙwace mata filin da take sana’ar abinci.
Maryam, a yayin wata hira da DCL Hausa, ta yi ƙorafin cewa da kuɗin gadonta ta gina wurin sana’arta, tun a 2017, inda ta ɗauki ma’aikata sama da 30 aiki.
Ta ce, Gwamna Abba Kabir Yusuf ya ce Kwamishinan ya canja mata wani filin, ita da sauran mutanen da aka tasa daga wurin da aka rushe, amma Kwamishinan ya ƙiya. A cewar ta, wasu Ƙwarori aka sayar wa filin, alhali su ‘yan ƙasa aka kore su.
“Na yi ƙorafi ga Kwamishina Ɗahiru, amma sai ya ce ai Ƙwarori sun daɗe a Kano, alhali duk baƙaƙen da aka gani a Kano, daga Gombe suke,” in ji Maryarm.
Ta sha alwashin ɗaukar babban mataki a kan Kwamishinan, idan bai ba ta filinta ba. A cewar ta, “ni ‘yar Kano ce, don haka babu wanda ya isa ya cinye mani haƙƙina, ya ba baƙi.”
_________
