JOS! JOS!! JOS: Muhimmin Saƙo Zuwa Ga Musulmi Da Kirista
Daga Daga Blessing David
__________
Abin da ya faru na kashe-kashe a cikin garin Jos, musamman a Unguwar Rukuba, abin tausayi ne matuƙa kuma abin takaici. Duk lokacin da aka rasa rayuka a tsakaninmu, dukkanmu ne muke rasa wani ɓangare na kanmu.
Ga waɗanda suka rasa ƙaunatattunsu, Ina miƙa saƙon ta’aziyya gare ku. Allah Maɗaukakin Sarki Ylya ba ku haƙuri da juriya a wannan babban rashi.
Ga waɗanda suka samu raunuka kuma suke jinya, ina addu’ar Allah ya ba su lafiya da cikakkiyar warkewa cikin gaggawa.
Jos gari ne na zaman tare. Garin da ya daɗe yana ƙoƙari da gwagwarmaya wajen gina zaman lafiya da haɗin kai tsakanin al’umma daban-daban. Kada mu bari wasu tsiraru su rushe abin da aka sha wahala aka gina.
Ina kira musamman ga matasa, kada ku bari wani ya yi amfani da ku wajen tada rikici. Ku zama ginshiƙan zaman lafiya, ku zama masu kare rayuka da dukiyoyin al’umma, ba masu lalata su ba.
Mu tuna cewa zaman lafiya ba na gwamnati kaɗai ba ne, alhakin kowa ne a cikinmu. Idan muka zaɓi zaman lafiya, za mu iya kare garinmu da makomar ’ya’yanmu.
Haka kuma ina kira ga gwamnati da hukumomin tsaro da su ɗauki matakan gaggawa da ƙarfi, domin kare rayuka da dukiyoyin jama’a, tare da tabbatar da cewa adalci ya tabbata.
Jos gidanmu ne. Kada mu bari jini ya raba mu. Mu zaɓi zaman lafiya, mu zaɓi ‘yan uwantaka, mu zaɓi rayuwa.
Allah Ya kawo mana zaman lafiya mai ɗorewa a Jos da Najeriya baki ɗaya.
__________
