Ni Bazawara Ce: To Kuma Sai Me?
~~~~~~~
Jamila Ibrahim, mace ce da ta san kanta. Ta yi fice a nan Soshalmidiya, inda take amfani da shafinta wajen wayar da kan mata da maza dangane da abin da ya shafi soyayya rayuwar aure da ma rayuwar yau da kullum. Ta yi wani tsokaci dangane da yadda wasu ke tsangwamar zawarawa, kamar yadda wasu zawarawan ke kunya da ƙyamar kasancewar tasu zawarawan. Ga abin da take cewa:
~~~~~~~
Related posts
An ce akwai mata masu kunyar gaya wa mutane su zawarawa ne. Ni da akwai yadda zan manna a CV ɗina ma kowa ya gani, da na manna!
Wanda bai sani ba ya sani, ni bazawara ce mai neman na kanta. Ni bazawara ce mai ƙoƙarin gina rayuwarta. Ni bazawara ce da ta san darajar kanta.
Ba na buƙatar a dinga tausaya mani, domin ina bazawara; sai dai a tausaya mani a matsayina na musulma kuma a matsayina na mace.
Ni bazawara ce mai neman in gyara kurakuraina, in ga na zauna lafiya da kowa da kuma wanda zan ƙara zaɓa a matsayin miji nan gaba.
Babu jin kunya wai don kina bazawara. Ƙaddara ce ta sa kika fito, sai ki rungumi ƙaddararki. Kar hakan ya sa ki kasa gaya wa duk wanda za ki yi alaƙa da su cewa kin taɓa aure. Ba kisa kika yi ba, rabuwar aure kika yi!
~~~~~~~
