Gasar Kofin Afrika: Yau Take Tsakanin Nigeria Da Morocco
Daga Bashir Yahuza Malumfashi
__________
Yau ake buga wasan kusa da na ƙarshe a Gasar Ƙwallon Ƙafa Na Kofin Afirka na bana (AFCON 2025) tsakanin Nigeria da Morocco. Za a fara wasan ne da ƙarfe 9:00 na dare, agogon Nigeria.
Wannan wasa babban ƙalubale ne ga Najeriya, domin Marocco ita ce mai masaukin baki, ga shi kuma tun a ƙungiyar gida ce daga 1976 take haƙilon neman ta lashe kofin amma ba ta samu ba. Dukkansu ƙungiyoyin biyu, ba su yi rashin nasara ba a gasar ta bana, har zuwa wannan mataki. Najeriya ta lashe duka wasanninta biyar yayin da Morocco ta yi nasara sau huɗu tare da kunnen doki a wasa ɗaya. Wannan ya nuna cewa wasan na yau zai kasance mai zafi sosai.
Ƙungiyar ƙwallon ƙafa ta Najeriya, Super Eagles tana da ƙarfi sosai kuma tana da azamar kai hari ga abokan adawa. Ta ci aƙalla ƙwallo biyu a kowanne wasa a gasar ta bana, wanda hakan shi ne mafi girma a tarihin ƙungiyar a gasar AFCON ɗaya. Victor Osimhen yana jagorantar kai hari tare da gudummawar da cin ƙwallaye da dama. Sai dai kuma cikas ɗaya ga ƙungiyar a wasan na yau, shi ne rashin Ndidi, wanda aka haramta wa buga wasa a yau. Hakan na iya shafar tsarin wasan Eagles a tsakiyar fili.
Ƙungiyar Morocco tana wasa ne da ƙarfin masu tsaron baya. Tana kiyaye tsaro, inda hakan ya sa ba a ci su ta ƙwallo ko ɗaya ba, a cikin wasanni huɗu daga cikin biyar. Brahim Díaz yana ɗaya daga cikin ‘yan wasan da ke fitowa fili da ƙwallaye masu yawa kuma kasancewar wasan a gida, zai ƙara musu ƙarfi.
Wannan wasa zai dogara ne da tsari da tattaunawa, domin Najeriya za ta yi ƙoƙarin buɗe wa Morocco ƙofa da sauri, yayin da Morocco za su yi ƙoƙarin murƙushe hari da kuma jiran damar cin ƙwallo daga kuskure ta ɓangaren Najeriya.
Tarihi ya nuna cewa dukkanin gasar AFCON da ƙasashen biyu suka buga a baya, ba su taɓa ƙarewa a turmi ɗaya ba. Wasanninsu kai kai su ƙarin lokaci, wani lokacin ma har sai an buga fanarati. Don haka wannan wasan zai kasance mai tsanani da zafi, tun daga farko har zuwa ƙarshe.
__________
