Daura Gidan Tarihin Hausa
Daga Bashir Yahuza Malumfashi
•••••••
A ranar Talata da ta gabata 06-05-1447 (Hijiriyya), 28-10-2025 (Miladiyya), na ziyarci birnin Daura saboda binciken wani bayani da ya shafi tarihi.
Na gana da mutumin kirki, rumbun tarihin Daura da ma sauran ƙasashen Hausa. Babu shakka Wakilin Tarihin Masarautar Daura, Alhaji Abubakar Magaji ya ƙoshi da ilimin tarihi. Ya kyautata mani kuma na samu cikakken bayanin buƙatar da ta kai ni Daura. Allah ya saka da alheri.
A wannan ziyara, na sake jaddada zumunci da abokan arziƙi, waɗanda suka haɗa da Sarkin Labaran Masarautar Daura, Alhaji Usman Ibrahim Yaro, wanda dama muka daɗe da zumunci, musamman kasancewar mahaifinsa, Alhaji Ibrahim Yaro, ɗaya ne daga cikin iyayen Ƙungiyar Gizago ta Najeriya (Allah ya ji ƙan shi da rahama).
Haka kuma na jaddada zumunci da Alhaji Yawale Musa Kallah, wanda shi ma mutumin kirki ne mai zumunci, wanda muka jima tare, musamman albarkacin Janar Muhammadu Buhari. Haka nan kuma, na yi zumunci da mutumin kirki, Malam Magaji Daura, wanda shi ma Bagizage ne jajirtacce kuma mai kyautata wa zumunta. Babu shakka sun yi ɗawainiya da ni. Allah ya saka masu da mafificin alheri, albarkacin zumunci da zumunta.
_______________
