TARON MALUMFASHI FACEBOOK CONNECT: YUNKURIN BUNKASA MALUMFASHI DA KEWAYE (8)
Daga Bashir Yahuza Malumfashi
_______________
Jama’a masu bibiyar wannan rahoto mai kama da muƙala, wannan shi ne rahoto kashi na 8, dangane da wannan babban taro da aka gudanar na Malumfashi Facebook Connect. Idan ba mu mance ba, an gudanar da taron ne a ranar Lahadi, 12-12-1446 (Hijiriyya), 08-06-2025 (Miladiyya).
Kamar yadda muka yi alƙawari, a wannan rahoton za mu yi bayani ne game da ɗaya daga cikin jajirtattun mutanen da aka karrama a wannan taron. Wannan kuwa shi ne Manajan Darakta na Hukumar Ruwa ta Jihar Katsina, Dokta Tukur Hassan Tingilin, FNSE.
√ Wane Ne Dokta Tukur Tingilin?
Tukur Hassan Tingilin. An haife shi ne a Unguwar Tingilin Malumfashi, Ƙaramar Hukumar Malumfashi, Jihar Katsina, a ranar Asabar – 4 ga Rajab, 1398 (Hijiriyya), daidai da 10 ga Yuni, 1978 (Miladiyya). Ya yi karatu mai zurfi, tun daga firamare, har zuwa matakin da ya samu Digirin Digirgir (PhD) a fannin Injiniya da ya shafi Ilimin ƙarafa (Mechanical Engineering). Ya yi gwagwarmayar neman ilimi a wurare da dama a cikin Najeriya da ƙasashen waje, musamman ma dai ƙasar China, inda a can ya yi karatun Digiri na biyu da na uku.
Injiniya Tingilin hadimin jama’a ne. Ya yi aikin koyarwa, kamar kuma yadda ya kasance mai fafutukar taimakon al’umma ta hanyar ƙungiyoyin sa-kai na tallafa wa al’umma. Haka kuma shi ɗan siyasa ne, wanda ya sadaukar da kansa domin hidima wa jama’arsa. A yanzu haka, shi ne Manajan Darakta na Hukumar Ruwa ta Jihar Katsina.
√ Dalilin Karrama Dokta Tingilin:
Ba Injiniya Tukur kaɗai ba, dukkan waɗanda aka karrama a wannan taro, mutane ne da sunansu ya buga tambari wajen taimakon al’umma a Malumfashi da kewaye, kamar mutane irin su Dokta Bala Funtua, Injiniya Muntari Sagir, Jibrin Sama’ila Jibson, Haruna Musa Rugoji da sauransu. Don haka an karrama Injiniya Tukur Tingilin a wannan taro ne bisa cancanta.
Tun ma kafin ya kai ga hawa wannan muƙami na Manajan Darakta a Gwamnatin Malam Dikko Umar Raɗɗa, duk wanda ya san shi, ya san mutum ne shi da ya saba da gudanar da ayyukan tallafa wa al’umma, musamman ma ta fuskar aikin gayya, ilimi da abin da ya shafi tallafi ga majinyata a asibitocinmu.
Ya zuwa yanzu, maganar gaskiya ba za a iya lissafa irin yawan tallafi da gudunmawar da Dokta Tingilin yake bayarwa ga al’umma ba, musamman ma ta hanyar gidauniyarsa ta Zanna-Wali Foundation. Duk fannin da ka duba, abin da ya kama da ɓangaren tsaro, harkar lafiya, ruwan sha, ilimi da kuma tallafin kuɗi kai tsaye ga mabuƙata, Injiniya yana yin iyaka ƙoƙarinsa.
Wata babbar ɗabi’a aka shaidi Dr. Tingilin da ita, ita ce ɗabi’ar jajircewa da ƙoƙarin neman na kansa. Yana da karimci da kara. Yana girmama mutane kuma ba ya ramuwar gayya.
Waɗannan dalilai da ma wasunsu da dama, su ne dalilan da suka sanya ya kasance ɗaya daga cikin zaratan mutanen Malumfashi da aka karrama a wannan babban taro. A lokacin da za a miƙa masa kambin karramawa, ba ya wajen taron, domin kuwa a lokacin yana ƙasa mai tsarki, Makka, wajen aikin Hajji. Muna yi masa fatan alheri.
Ina sha Allahu, a rahoto na gaba, kashi na 9, za mu tattaunawa a kan DPO na Malumfashi, CSP Bello Umar, wanda shi ma aka karrama, saboda gudunmawarsa ta fuskar tsaro a Malumfashi da kewaye.
_______________
