Sasanci Da ‘Yan Bindiga: A Sake Duba Lamarin Nan A Tsanaki
•••••••
A wasu ƙananan hukumomi na Jihar Katsina, rahotanni sun nuna cewa ana ci gaba da ƙoƙarin sasanci da ’yan bindiga da suka addabi jama’a tsawon shekaru. Waɗannan tattaunawa, a cewar wasu jami’an gwamnati da shugabannin al’umma, na nufin dawo da zaman lafiya da kwanciyar hankali a yankunan da rikici ya daɗe yana faruwa. Sai dai duk da wannan nufi na alheri, akwai tambayoyi masu nauyi da ke tasowa kan sahihancin irin wannan sasanci.
Related posts
Da farko, abin damuwa ne ganin cewa ’yan bindigar suna halartar sasancin da cikakkun makamai a hannunsu, ba tare da wata alamar miƙa wuya ko tuba na gaske ba. Wannan hali yana nuna cewa suna kallon sasancin ne a matsayin wata hanya ta samun hutu ko kariya daga farmakin dakarun tsaro, ba don su bar miyagun ayyukansu ba.
A tsarin doka da adalci, tuba na gaskiya yana nufin miƙa kai da miƙa makami, tare da nuna nadama bisa laifin da aka aikata. Amma idan babu waɗannan abubuwa, to wannan ba sulhu ba ne, wasa ne da rayukan mutane.
Haka kuma, akwai batun adalci ga dubban mutanen da suka rasa rayuka, dukiyoyi, da ’yan uwa sakamakon ta’addancin waɗannan gungun ’yan bindiga. Yaya za su ji idan suka ga waɗanda suka k+she mutane da dama, suka ƙ+ne ƙauyuka, suna tafiya cikin jama’a cikin walwala, wai saboda an yi musu afuwa? Wannan yana raunana tsarin doka, yana kuma jefa mutanen da suka yi asara cikin ƙarin damuwa da takaici.
Abin da ake buƙata shi ne, gwamnati ta sake nazari kan irin wannan tsarin sasanci, ta maida hankali kan inganta tsaro da amfani da dabarun da za su hana komawar ’yan ta’adda zuwa ɓarna. Dole a tabbatar da cewa tuba na gaskiya ne, ba wai wata yarjejeniya ce ta ɓoye da za ta ƙara ƙarfafa gungun ’yan bindiga ba.
A batun gaskiya ta Allah. Idan aka ci gaba da rungumar sasancin da ba shi da sahihanci, to za a ci gaba da ganin ’yan bindiga suna dawowa da sunaye daban-daban amma da manufa ɗaya, ta zaluntar talakawa da tarwatsa zaman lafiya. Don haka, lokaci ya yi da gwamnati za ta fifita gaskiya da adalci fiye da tsarin sasanci na wucin gadi.
