Yau Za A Fafata Tsakanin Canada Da Bosnia-Herzegovina
__________
Yau Juma’a, ƙasar Canada za ta karɓi baƙuncin wasan rukuni na B na Gasar Kofin Duniya tsakanin Ƙungiyar Ƙwallon Ƙafa ta Canada da ta Bosnia-Herzegovina.
Za a buga wasan ne a filin wasa na Toronto Stadium (wanda aka fi sani da BMO Field) da ke birnin Toronto na ƙasar Canada.
Wannan wasa yana da muhimmanci sosai ga Canada, domin shi ne wasa na farko a gare ta, a matsayinta na ɗaya daga cikin ƙasashen da ke karɓar baƙuncin gasar ta bana.
A ɓangaren ‘yan wasan da ake sa ran za su haskaka, Canada za ta dogara sosai kan fitaccen ɗan wasanta, Jonathan David, wanda yake ɗaya daga cikin manyan masu zura ƙwallaye a Turai, tare da Cyle Larin da Tajon Buchanan.
Duk da cewa kyaftin ɗin ƙungiyar, Alphonso Davies ba zai buga wasan ba saboda rashin lafiya, Canada har yanzu tana da ƙwararrun ‘yan wasa masu iya sauya yanayin wasa.
A ɓangaren Bosnia-Herzegovina kuwa, idanu za su karkata ga tsohon gwarzon ƙungiyar, Edin Džeko, wanda ya dawo fagen leda, bayan warkewa daga jinyar rauni kuma zai jagoranci hare-haren ƙungiyarsa, tare da Ermedin Demirović wanda yake cikin fitattun ‘yan wasan gaba na ƙasar.
Ana hasashen cewa wasan zai kasance mai zafi da fafatawa sosai. Canada za ta yi amfani da goyon bayan dubban magoya bayanta a gida, yayin da Bosnia-Herzegovina za ta shiga wasan da ƙarfin gwiwa, bayan nasarar da ta samu wajen kai wa gasar.
Ana hasashen cewa Canada za ta fi mamaye wasan da kai hare-hare amma Bosnia za ta kasance mai haɗari ta fuskar kai farmaki cikin sauri. Amma an ƙiyasta cewa ƙasar Canada ce za ta yi nasara da ci 2-1 ko kuma wasan ya tashi kunnen doki 1-1, musamman ma idan Bosnia ta yi amfani da damar da ta samu yadda ta kamata.
__________
