ALIYU ƘANƘARA YA ZAMA FARFESA
Daga Bashir Yahuza Malumfashi
•••••••
Shahararren marubucin Hausa, wanda ya yi fice wajen bincike kan rayuwa da waƙoƙin Dokta Mamman Shata Katsina, Dokta Aliyu Ibrahim Ƙanƙara ya samu ci gaba a fannin ilimi, inda ya zama Farfesa na farko a fannin ilimin da ya shafi halittun duwatsu (Geology) a Jami’ar Tarayya Dutsin-ma, Jihar Katsina.
Related posts
Muƙaddashin Shugaban Jami’ar, Farfesa Aminu Ado ne ya sanar da wannan ci gaba a yayin taron musamman karo na 135 na Hukumar Zartarwa na Jami’ar, a ranar Alhamis, 2 ga Oktoba, 2025.
A yayin taron, wanda ya gudana a ɗakin taro na Sashin Nazarin Noma da ke babbar harabar Jami’ar, Shugaban jami’ar ya bayyana cewa: “Ka sanya mu farin ciki, kuma muna alfahari da kai. Muna fata wannan muƙami zai zama mai amfani ga babbar jami’armu da kuma ƙasa baki ɗaya.”
Wata baiwa da Allah ya ba Farfesa Aliyu Ƙanƙara, ita ce ta rubuce-rubuce a fannin adabin Hausa. Mafi yawan mutane a Arewa, sun fi sanin shi da nazari da rubuce-rubuce a kan rayuwa da waƙoƙin mashahurin mawakin Hausa, marigayi Dokta Mamman Shata Katsina. Ya rubuta littattafai da maƙaloli da sharhi a kafafen watsa labarai, dangane da abin da ya shafi Shata da waƙoƙinsa.
Muna taya Farfesa Aliyu Ƙanƙara murna, bisa wannan ɗaukaka da ya samu, tare da fatan Allah ya sa ilimin ya zama mai amfani ga al’umma baki ɗaya, Amin.
_______________
