Daga Bashir Yahuza Malumfashi
A yau Alhamis, Shugaban Ƙasa, Bola Ahmad Tinubu ya amince da naɗin Malam Nuhu Ribaɗu a matsayin Mai Ba Da Shawara Ga Shugaban Ƙasa Kan Al’amuran Tsaro.
Malam Nuhu, wanda shi ne tsohon Shugaban Hukumar Yaƙi Da Almundahana (EFCC), an ambata naɗin nasa ne tare da wasu mutanen da su ma aka naɗa a mabambantan muƙamai.
Waɗanda aka naɗa sun haɗa da Dele Alake, a matsayin Mai Ba Da Shawara A Kan Ayyuka Na Musamman da Ya’u Darazo, A Kan Al’amuran Siyasa da Wale Edun, Kan Harkokin Kuɗi.
Sauran sun haɗa da Zachaeus Adedeji, Mai Ba Da Shawara Ƙan Al’amuran Kuɗin Shiga da John Ugochukwu Uwajumogu, A Fannin Masana’antu, Kasuwanci da Zaka Hannun Jari. Sai kuma Uwargida Salma Ibrahim Anas, wacce aka naɗa Mai Ba Da Shawara Kan Al’amuran Lafiya.
