Muhimmanci Da Tasirin Biyayya Ga Ubangida
Daga Bukar Usman
•••••••
Ɗan uwana Malam Garba Shehu,
Na rubuto wannan taƙaitaccen tsokaci ne, domin in bayyana godiyata ta musamman, bisa ziyarar da kuka kawo mani, kai da abokinka Malam Idris Ado Baba Nabegu a kwanakin baya; inda har kuka kawo mani sabon littafinka mai take ‘According to the President’ (Venturion, 2025). Lallai wannan babban karimci ne kuka nuna mani.
Littafin ya kasance abin sha’awa da daɗin karatu. Ɗan kaɗan da na fahimta daga cikinsa shi ne, yadda ka tsaya tsayin daka wajen yi wa iyayen gidanka hidima. Na farko, tsohon Mataimakin Shugaban Ƙasa Atiku Abubakar da dangantakarsa da tsohon Shugaban Ƙasa Olusegun Obasanjo da sauran abokai. Na biyu kuma, ka yi iya bakin ƙoƙarinka wajen bayyana ƙimar ubangidanka na ƙarshe, tsohon Shugaban Ƙasa Muhammadu Buhari – a lokacin mulki da bayan barinsa. Ka kare gaskiyarsa da sahihancin shugabancinsa har zuwa ƙarshe.
Kodayake ba tarihin rayuwarka kai tsaye ka rubuta a littafin ba, ka bayyana wasu sassa na rayuwarka a taƙaice, cikin tawali’u. Ka nuna yadda ka taso a rayuwa, a matsayin mahaifinka direba. Ka samu ilimin boko kuma ka ɗauki mataki tun da wuri wajen zaɓar aikin da kake so a rayuwa, kuma ka tsaya a kansa bisa tarbiyyar da ka samu daga halaye nagari abin koyi; irin na marigayi Malam Aminu Kano – wanda ya sadaukar da rayuwarsa wajen kare muradun talakawa.
Ka samu amincewa da amana daga iyayen gidanka, waɗanda ka yi wa hidima cikin tsantsar sadaukarwa tare da amfani da dabaru da hikimomin da ka koya a fagen aikin jarida da sadarwa. A cikin wannan aiki, ka yi haɗin kai da abokan aikinka cikin zumunci da kyakkyawar alaƙa.
Ba shakka, masu aikin jarida da hulɗar jama’a, ko waɗanda ke sha’awar yin karatu a waɗannan fannoni, suna da abubuwa masu yawa da za su koya daga wannan littafi, domin ka fayyace irin ƙalubalen da ake iya fuskanta a fagen aiki da kuma muhimmancin lura da su domin samun nasara.
Haƙiƙa, akwai haɗurra ko ƙalubalen aikin da kan iya kai mutum zuwa kurkuku, waɗanda dole ne mutum ya shirya wa fuskantarsu, musamman idan ya tsaya kan gaskiya da adalci a aikin nasa.
A aikin jarida, halayyar riƙe sirri, hanyoyi da hikimomin isar da saƙo domin kare mutumci suna da yawa. A zahiri, irin waɗannan hikimomi sun haɗa da fahimtar ƙarfi da tasirin kafafen watsa labarai, kula da muhimman bayanan sirri, karewa da ɓoye kafofin samun bayanai da fahimtar bambanci tsakanin “yaɗa labarai” da “sadarwa.” Haka ma, akwai fahimtar yadda za a kwantar da rikice-rikice, sanin makamar hulɗa da jama’a, kasancewa a iya samun mutum da ƙwarewa wajen iya tsarawa da aika saƙo. Sauran sun haɗa da natsuwa, cancanta, daidaito, gaskiya, tsantseni, adalci da tsayawa kan gaskiya da sauransu da dama.
Tabbas al’amarin a bayyane, cewa Ubangidanka na ƙarshe, Shugaba Buhari, kamar yadda ya ce, ya yi iya bakin ƙoƙarinsa wajen yi wa ƙasa hidima daidai iyawarsa kuma cikin sadaukarwa. Haka ma za a iya cewa kai ma ka yi iya bakin ƙoƙarinka a fagen aikin jarida da sadarwa, wajen yi wa ubangidan naka da ƙasar nan hidima. Ka zama abin alfahari, wanda ya cancanci girmamawa daga abokan aikinka, ganin yadda ka gudanar da aiki cikin ƙwarewa, ta yadda hatta su iyayen gidan naka da sauran jama’a suka yaba. Ina taya ka murna ƙwarai!
Ina yi maka fatan alheri a harkokinka na rayuwa, musamman a fagen aikin jarida da sauran sabgogi.
__________
Bukar Usman, OON, tsohon Babban Sakatare a Fadar Shugaban Ƙasa, Abuja.
