KIRA NA MUSAMMAN GA JAMI’AN TSARO A MALUMFASHI
Daga Bashir Yahuza Malumfashi
Ina son jawo hankalin JAMI’AN TSARO na garin Malumfashi Jihar Katsina, dangane da ƙorafin cewa wasu daga cikinsu, suna wuce makaɗi da rawa a yayin gudanar da aikinsu a cikin gari da kewaye.
A jiya Jumu’a, 27-01-1446 (Hijriyya), daidai da 02-08-2024 (Miladiyya) na samu kira tare da ƙorafi daga wani bawan Allah, daga Unguwar Gangarawa Malumfashi, inda ya sanar da ni wani abin takaici da ya faru a gidansa da na maƙwabtansa.
Kamar yadda ya ce, wani jami’in ɗan sanda ne, wanda yake ɗauke da bindiga ya shigo cikin gidansa da gudu, wai yana son kama wani yaro ne da yake cikin ‘yan zanga-zanga.
Ya ce ɗan sandan ya saka matansa da ‘ya’yansa da shi kansa cikin fargaba da tsoro, domin yadda jami’in yake ɗauke da bindiga kuma ya shigo gidan da tsananin gudu, babu ko sallama.
Ya ce da ya ƙalubalanci jami’in cewa ya fita daga gidansa, da ƙyar ya fita bayan ya ga yadda ransa ya ɓaci, tare da sanar da shi cewa bai kamata ya kutso gidansa ba tare da izini ba kuma ba tare da waranti daga alƙali ba.
Na samu bayanin cewa, ba gidan wannan bawan Allah kaɗai wasu jami’an ‘yan sanda tare da wasu ‘yan banga suka shiga ba. Ya ce a yayin da suke faturun, sun riƙa shiga gidajen mutane da nufin wai kama masu Zanga-zanga.
Bisa ga haka, ina kira ga shugabannin jami’an tsaro na Malumfashi, da su tsawata wa irin waɗannan jami’an tsaro, su gyara aikinsu domin su dace da kare haƙƙin shari’a. Lallai ya kamata a riƙa mutunta haƙƙin ‘yan Adam a yayin gudanar da aikin kare doka.
Batun gaskiya, shiga gidajen mutane ba tare da waranti na ƙa’ida ba, hakan wuce wuri ne kuma saɓa doka ne.
Allah Ya taimaki jami’an tsaron mu, Ya ba su nasarar magance dukkan matsalolin tsaro da muke fuskanta, Amin.
___________
Bashir Yahuza Malumfashi,
Babban Edita,
Mujallar Taskar Gizago (online)
Inda sunbari yaran sun tada rikici anyiwa mutane sata mezakayi kawai ankiraka kaikuma kayarda ko kuma dasu suka raunata yansandan fa to yaran dakake magana sunasone ayi rikici suyiwa mutane sata