Gwamna Radda Zai Ƙaddamar da Kotunan Zamani A Jihar Katsina
Daga Bashir Yahuza Malumfashi
__________
Gwamnan Jihar Katsina Malam Dikko Umaru Radda, ya sanar da shirin zamanantar da tsarin shari’a ta hanyar amfani da fasahar zamani, gudanar da zaman kotuna ta intanet, inganta samar da wutar lantarki da kuma ƙarfafa jin daɗin ma’aikatan shari’a.
Gwamnan ya bayyana hakan ne yayin buɗe taron shekara na shari’a (Legal Year) 2026/2027 na Babbar Kotun Jihar Katsina, inda ya sake jaddada aniyar gwamnatinsa na tabbatar da ‘yancin kai a ɓangaren shari’a da kuma hanzarta gudanar da shari’a cikin adalci.
Ya bayyana cewa an amince da shirin sanya tsarin shari’a cikin kwamfuta, tare da gudanar da zaman kotuna ta hanyar intanet a hedikwatar Babbar Kotun da rassanta na Funtua, Daura, Malumfashi da Dutsin-Ma. Haka kuma, an fara sanya na’urorin samar da wutar lantarki ta hasken rana a hedikwatar kotun.
Gwamna Radda ya kuma bayyana matakan inganta jin daɗin alƙalai, ciki har da samar musu da filayen gine-gine da alawus na musamman, tare da shirye-shiryen sabunta motocin aiki da samar da rancen motoci ga alƙalai da sauran jami’an shari’a.
A nasa jawabin, Babban Jojin Jihar Katsina, Mai Shari’a Musa Danladi Abubakar, ya bayyana cewa kotunan jihar sun karɓi shari’o’i sama da 86,000 a shekarar shari’ar da ta gabata, inda kotunan shari’ar Musulunci suka karɓi 59,291, kotunan Majistare suka karɓi 22,842, yayin da Babbar Kotun ta karɓi 3,667.
Ya kuma buƙaci ƙarin ɗaukar ma’aikata da gyaran hedikwatar Babbar Kotun, domin inganta ayyukan shari’a a jihar.
A nasa ɓangaren, Babbar Lauyar Gwamnati kuma Kwamishiniyar Shari’a, Hajiya Fadila Mohammed Dikko, ta tabbatar da aniyar ma’aikatarta na ci gaba da haɗin gwiwa da bangaren shari’a, wajen kare haƙƙin jama’a da tabbatar da bin doka da oda.
__________
