AIKIN RUWA A MALUMFASHI: AN BUƘACI AL’UMMA SU BA HUKUMA HAƊIN KAI
Daga Bashir Yahuza Malumfashi
An buƙaci al’ummar Ƙaramar Hukumar Malumfashi da kewaye da su kai hankali nesa, su ba Hukumar Ruwa ta Jihar Katsina da Manajan Daraktanta, Injiniya Tukur Hassan Tingilin goyon baya da haɗin kai, domin ganin an kammala aikin sabunta bututun ruwa cikin nasara, domin amfanin al’umma gaba ɗaya.
Wannan kira ya fito ne daga bakunan jajirtattun masu kishin Malumfashi, Injiniya Muntari Sagir da kuma Alhaji Jibrin Sama’ila (Jibson). Kiran nasu yana zuwa ne a sakamakon wata rashin fahimta da ta faru a kwanakin baya, dangane da aikin ruwan da ake gudanarwa a garin na Malumfashi.
Rashin fahimtar ta faru ne, inda aikin binne sabbin bututun ya shafi bakin shagunan wasu ‘yan kasuwa da ke bakin titi; waɗanda suka yi ta ƙorafi da nuna rashin yarda da aikin.
A tattaunawarsa da wakilinmu, Alhaji Muntari Sagir, shugaban kamfanin gine-gine na Muntasarab, ya shawarci al’ummar Malumfashi da kewaye, da su riƙa yin haƙuri da hukuma da jami’anta, musamman dangane da aikin da zai amfani al’umma. A cewarsa, “wannan aikin ruwa zai amfani al’umma ne gaba ɗaya. Mutane ba za su gane tasiri da muhimmancinsa ba sai nan gaba.”
Injiniya Muntari ya ƙara da cewa ya kamata al’ummar Malumfashi da kewaye, su riƙa nuna goyon baya da ƙarfafa wa mutanensu da suka samu dama a gwamnati gwiwa, maimakon cin zarafi da nuna rashin godiya.
“Ya kamata mutane su fahimta da cewa, kishin Malumfashi ne ya sanya Tukur Tingilin ya kawo aikin inganta samar da ruwan sha a garin. Goyon baya da ƙarfafa gwiwa yake buƙata ba tozarci ba.” Inji Muntari Sagir.
Haka kuma ya yaba wa M. D. Tukur Tingilin bisa yadda yake taimakon al’umma ta ɓangaren inganta ilimin yara da sauransu. Sai dai ya shawarce shi da cewa ya daina biye wa masu sukarsa, ya riƙa kauda kai daga abin da za su faɗa, ya daina cewa zai maida masu da martani.
A nasa ɓangaren shi ma, Alhaji Jibrin Sama’ila (Jibson), shugaban kamfanin JIBSON NASAKA INVESTMENT, yabawa ya yi da aikin ruwan da ake gudanarwa a garin Malumfashi. Kamar kuma yadda ya nuna yabo ga Injiniya Tukur Tingilin, wanda ya yi tsayin daka wajen tabbatutuwar aikin.
“Ina kira ga wasu matasa masu hawa Soshalmidiya suna rashin kunya da tozarta manya, cewa hakan da suke yi, ba daidai ba ne. Ku riƙa daraja manya kuma idan kuna da ƙorafi ko wata shawara ga jami’in gwamnati, ku riƙa gabatar da su cikin hikima da ladabi, ba da tozarci ba.” In ji Alhaji Jibrin.
