Daga Bashir Yahuza Malumfashi
Sufeto-Janar na ‘Yan Sandan Najeriya na riƙon ƙwarya, Olukayode Adeolu Egbetokun ya bayyana cewa ya shirya tsaf a ƙudurinsa na kawo canje-canje da za su sauya fasalin aikin ‘yan sanda da na jami’ai, yadda zai dace da zamani da ƙwarewa.
A cewar Kakakin Rundunar ta ‘yan sanda, CSP Olumuyiwa Adejobi, Sufeto-Janar ɗin tuni ya samar da daftarin da zai samar da sauye-sauyen da ake buƙata, musamman ta fuskar ba da horo a makarantun ‘yan sanda bisa manhaja mai dacewa, wacce za ta sauya halayen jami’an na ‘yan sanda, su zamo masu ƙwarewa a aiki, wanda haka zai samar da aminci da natsuwa tsakaninsu da al’ummar ƙasa.
Ya ce Shugaban na ‘yan sanda tuni ya daɗe da sanin cewa aikin kare doka da samar da tsaro yana tattare da ƙalubale masu yawa, kamar kuma yadda yake da faɗi sosai. Don haka ya ce ba kawai ƙarfi yake buƙata ba, har da hikima, ƙwarewa da kuma sanin ya kamata. Don haka ya ce za a samar da tsarin koyarwa mai inganci a kwalejoji da cibiyoyin horar da jami’an ‘yan sanda, ta yadda jami’an, za su samu sauyin halaye na nagarta, gaskiya da amana da kiyaye ‘yancin ɗan Adam, a yayin gudanar da aikinsu ga al’ummar ƙasa.
