Kada Ku Sayar Da Abicin Nan…
– Gwamna Dikko Radda
__________
Gwamnan Jihar Katsina, Dakta Dikko Umaru Radda, CON, ya ce “wannan tallafin ba na siyarwa ba ne. An ba da shi ne, domin amfaninku da iyalanku.”
Wannan gargaɗi, Gwamna Radda ya yi shi ne kai tsaye ga waɗanda suka amfana da tallafin abinci, ƙarƙashin shirin Renewed Hope Initiative.
Gwamnan ya bayyana hakan ne yayin ƙaddamar da rabon kayan abinci ga masu ƙaramin ƙarfi, wanda Uwargidan Shugaban Ƙasa, Sanata Oluremi Tinubu, ta shirya a filin People’s Square da ke Gidan Gwamnatin Jihar Katsina.
Uwargidan Mataimakin Shugaban Ƙasa, Hajiya Nana Kashim Shettima, wadda ta wakilci Uwargidan Shugaban Ƙasa a wajen taron, ta bayyana cewa Katsina ita ce jiha ta 30 da ta amfana da shirin, wanda ke da manufar tallafa wa iyalai masu buƙata da rage matsalar ƙarancin abinci.
A nasa jawabin, Gwamna Radda ya bayyana cewa shirin ya zo a daidai lokacin da ake buƙatar ƙarfafa tallafin jin ƙai ga al’umma, yana mai cewa gwamnatinsa tana ci gaba da aiwatar da shirye-shirye masu dogon zango, ƙarƙashin shirin gwamnatinsa na Building Your Future Agenda, a fannonin ilimi, noma, lafiya da tsaro.
Ya kuma bayyana wasu nasarorin gwamnatinsa, ciki har da gina sabbin makarantun sakandare 170, gyaran wasu 100, samar da taraktoci sama da 400 da farfaɗo da cibiyoyin kula da lafiya na matakin farko sama da 200 a faɗin jihar.
A nata jawabin, Hajiya Nana Shettima, ta bayyana kammala tsarin Shirin Bankunan Abinci na Al’umma na Ƙasa, tare da kira ga gwamnonin jihohi da su kafa bankunan abinci a kowace Shiyyar Sanata, domin yaƙi da yunwa da rashin abinci mai gina jiki.
Ita ma Uwargidan Gwamnan Jihar Katsina, Hajiya Zulaihat Dikko Radda, ta bayyana cewa shirin Renewed Hope Initiative ya tallafa wa tsofaffi 750 da kuɗi sama da Naira miliyan 125 cikin shekaru uku, baya ga tallafin da aka bai wa mata ‘yan kasuwa, domin bunƙasa sana’o’insu.
Taron ya samu halartar matan gwamnonin jihohin Arewa maso Yamma, Mataimakin Gwamnan Katsina, Hon. Faruk Lawal Jobe, Shugaban Majalisar Dokokin Jihar Katsina, Hon. Nasir Yahaya Daura da sauran manyan jami’an gwamnati.
__________
