Daga Yusuf Dingyaɗi, Sakkwato
Muddin aka ci gaba da rufa-rufa, ba a ɗauki shawara masana aikin sanin makama a kan samar da ruwan sha b a Sakkwato, to tabbata, har yanzu akwai matsaloli tattare da samar da ruwan issashe ga al’umma.
Rashin ɗaukar shawarwarin da tsoffafin kwamishinonin ruwa suka bayar, mussaman irin su Hon UMAR BATURE don sake fasalta aikin gidan samar da ruwa da farfaɗo da tsarin gyara da inganta bututun ruwa na gidan ruwan Sakkwato da maido da darajar ma’aikatan gidan ruwa na Sakkwato; tabbata duk wani gyara na yanzu tamkar wucin gadi ne.
Daga cikin tsarinsa har da neman gwamnati ta gina ƙananan tashoshin samar da ruwan sha a cikin manyan unguwani, waɗanda za su samar da ruwa daga manyan bore-hole bore-hole da za a gina irin na zamani don aikawa ga unguwanin da ke da nisa da gidan ruwa ko tashoshinsu.
Haka ma akwai ƙara kuɗaɗen tallafi na mussaman kai tsaye daga ofishin gwamna zuwa hukumar samar da ruwan sha ta jiha da gina ƙananan rijiyoyin burtsatse g al’umma.
Haka ma akwai matakin hukunci ga waɗanda suka gina reservoir na tara ruwa a gidajensu, don tasu biyan buƙata, inda suka hana talakawa samun issasun ruwan da ake turawa na fanfo daga tashoshin samar da ruwan na Old Market, Ali Aƙilu, Tasha Illela da Runjin Sambo.
Kwamishinonin ruwa Hon. Bature da Hon. Yabo duk sun mayar da hankali kacokan ga bin tsarin hanyoyin bunƙasa samar da ruwa da aiki kafaɗa-kafaɗa da ƙwararrun ma’aikatan gidan ruwa da suka yi wa Water Board aiki a baya, don samun shawarar bunƙasa wannan aikin na samar da ruwan sha a Sakkwato cikin ɗan lokaci.
Daga galan miliyan biyu zuwa huɗu yanzu ana buƙatar fiye da galan miliyan goma don amfanar da jama’a; sai kuma buƙatar bunƙasa aikin gidan ruwa na Asari, wanda tun farko ake zargin Gwamnatin Wamakko ta yi coge gare sa, da sake faɗaɗa gidan ruwa na Runjin Sambo. Waɗannan duk muhimman ayyuka ne da ke da tasiri ga samar da ruwan sha ga al’ummarmu.
Ya dace Hukumar Samar da Ruwan Sha ta dawo da karɓar kuɗaɗen ruwa ta amfani da hanyoyin zamani, a maimakon dogara ga kuɗin shiga daga ma’aikatan gwamnati da kamfanoni kaɗai.
Yana da kyau kamin Gwamna ya naɗa Kwamishina da zai kula da ma’aikatan ruwa, ya yi garambawul baki ɗaya ga Hukumar Samar da Ruwan Sha ta Jihar Sakkwato, ya sake fasalta aikinta, ya ɗauko masu ‘Contract ‘ tsoffafin ma’aikatan da suka yi hoɓɓasa a baya, don ganin sun maido da darajar hanyoyin inganta samar da ruwan sha a birni da ƙauyuka.
Haka ma a rushe gine-gine da aka yi a kan manyan bututun da ke kai ruwan sha a cikin gari da sake sabunta wasu daga ciki da tsufa ya hana su aiki.
Tsarin nan na Hon. Umar Bature da Injiniya Shehu Mafara, su ne muhimman hanyoyin da za su ceto Jihar Sakkwato daga ci gaba da fuskantar barazanar ƙarancin ruwan sha a Sakkwato.
A yanzu da lamarin ɗumamar yanayi ke ƙara ta’azzara ga duniya baki ɗaya, lokaci ya yi da za mu aje mummunar fahimta ta ɗora laifi ga gwamnati ita kaɗai, a kan abin da ya shafi ƙarancin ruwan sha, don kuwa yanzu ya zama darasi a kan waɗanda suke zargin Gwamnatin Tambuwal da zama dalilin haka.
Zancen biyan kuɗaɗen bashi na NEPA, wannan duk buge ce. Muhimmin abin da ya dace, Gwamnatin Jihar Sakkwato ta gaya wa al’umma gaskiya a kan matsalolin da ke tattare da aikin samar da ruwan sha da rarraba shi.
Matsalar yanayi da rashin isasshen ruwa daga ainihin gulaben da ke kawo ruwan kamin tace shi; tsadar kayan gyara da ƙarancin kuɗaɗen tallafi na aiki ga Hukumar Samar da Ruwa da sauransu na daga cikin ababen da ya dace a yi wa jama’a bayani dalla-dalla.
Su kansu al’umma suna da nasu laifi a kan rashin biyan kuɗaɗen ruwa da na tallafi da ake nema, wasa da ruwan sha da yin ko oho ga gyaran bututu a unguwanninsu da sauran matsalolin da ke barazana ga samun ruwan sha.
Allah Ya kawo MAFITA
Malam Yusuf Dingyaɗi Sakkwato, shi ne Mashawarci ga tsohon Gwamnan Jihar Sakkwato, Waziri Tambuwal
