Cikin ‘yan kwanakin nan biyu, na lura da yadda wasu suke ta zuzuta tozarci ga sabon Gwamnan Jihar Kano, Abba Kabir Yusuf saboda a fahimtarsu ya tafka kurakurai a yayin gabatar da jawabinsa da Ingilishi.
Abin da ma ya ƙara ba ni takaici, wasu ma fa ko Ingilishin ma na kirki ba su iya ba, kawai kiɗanta-na-jiyo ne, amma suka haƙiƙice suna yi wa Gwamna dariya da shegantaka. Ta kai ga wai har ana buga tambarin kalmomin turanci ga huluna da singileti. Haba jama’a, me yai zafi haka?
Shin wai me mutane suka ɗauki Ingilishi ne? Me ya sa ma muke guje wa magana da harshenmu da Allah Ya albarkace mu da shi? Me ya sa idan mutum ya yi kuskure a magana da harshenmu na gado, ba a kulawa amma da zarar mutum ya yi kuskure a yaren da ba nasa ba, sai a hayayyaƙo masa da tozarci?
Ni a ganina, lokaci ya yi da shugabanninmu za su fara martaba harsunanmu, su riƙa amfani da Hausa a duk lokacin da za su gabatar da jawabi ga al’ummarmu. Domin dai amfanin jawabin shi ne domin isar da saƙon da zai amfani al’umma. To ina amfanin mutum ya yi ta zuba Turanci alhali kaɗan ne daga mutanen da yake magana da su za su fahimta?
Lokaci ya yi da za mu zama ‘yantattu, mu ‘yanto kanmu daga bautar Turawa da Turanci. Lokaci ya yi da za mu fuskanci gaskiya da gaskiya. Naka sai naka, domin kuwa babu yadda wani shugaba a Amurka ko a Ingila ko a Faransa da zai kalli mutanensa ya ce zai yi masu jawabi da Hausa ko Ibo ko Yarabanci. To mu me zai sa mu raina kanmu?
Kashi 100 cikin 100 na al’ummar Kano da Hausa suke magana kuma da shi suke mu’amala da juna. To ina hikima a ce dole sai da Turanci shugabansu zai yi masu jawabi?
Na bi TURANCI da gudun famfalaƙi!
——
© Bashir Yahuza Malumfashi
Asabar 14-11-1444 (Hijriyya)
03-06-2023 (Miladiyya)
–
Allah ya karawa Jagoran Gizagawan Nigeria Lafiya
Amin Amin Ya Allah. Jazakallahu khairan!
Salallamin Salamatun Silamen Sakkwato. Barman da kokari
Dodorido a kan shorido. Muna godiya. Mishodi.
Barka kadai Dodo