Matasa Ku Ƙara Himma Domin Dogaro Da Kai – Gwamna Radda
Daga Wakilinmu
__________
Gwamnan Jihar Katsina, Malam Dikko Umaru Radda, ya buƙaci mata da matasa su dage wajen koyon sana’o’i, bunƙasa ƙwarewarsu da kuma samar da kasuwannin da za su ba su damar dogaro da kansu.
Gwamnan ya bayyana haka ne a ranar Asabar, yayin taron Shugabannin Masana’antu Da Baje Kolin Harkokinsu (CEOs Round Table Summit and Exhibition) karo na huɗu da aka gudanar a ɗakin taro na Hillside a garin Katsina, inda ya jaddada cewa bunƙasa sana’o’i da kasuwanci na da muhimmiyar rawa wajen ƙarfafa tattalin arziki, samar da ayyukan yi da kuma inganta tsaro.
Ya ce samun kuɗi kaɗai bai wadatar wajen samun nasarar kasuwanci ba, domin ana buƙatar ƙwarewa, kasuwa da jari domin gina sana’o’i masu ɗorewa. Ya kuma ƙarfafa matasa da su rungumi sana’o’in hannu da na gargajiya, tare da sabunta su ta hanyar amfani da fasaha da inganta kasuwancinsu.
A nata bangaren, mai shirya taron, Lubabatu Umar Ahmed, ta yaba wa Gwamnatin Gwamna Radda bisa tallafin da take bai wa ƙananan da matsakaitan ‘yan kasuwa, inda ta ce shirye-shiryen gwamnati sun taimaka wajen ƙarfafa rayuwar mutane 17,400 a jihar Katsina.
Da take wakiltar Uwargidan Gwamna, Hajiya Zulaihat Dikko Radda, Mai Bai wa Gwamna Shawara kan harkokin Banki da Kuɗi, Bilkisu Suleiman Ibrahim, ta ƙarfafa matasa da su rungumi fasaha, neman shawarwari daga ƙwararru da kuma amfani da damar samun tallafin gwamnati.
Shi kuwa Kwamishinan Noma, Hon. Aliyu Lawal Zakari Shargalle, ya bayyana cewa sama da matasa 800 sun amfana da shirin Songhai, inda ake ba su horo da tallafin fara sana’a bayan kammala karatu. Ya kuma ce wasu matasa kusan 700 na samun horo kan sana’o’i daban-daban tare da kayan aiki da tallafin kuɗi a wannan cibiyar, inda ya buƙaci ƙulla alaƙa da ma’aikatar gona domin tallafawa mata.
A nata bangaren, Kwamishiniyar Harkokin Mata, Hajiya Aisha Aminu Abdullahi Malumfashi, ta ce gwamnati na ƙara faɗaɗa shirye-shiryen tallafa wa mata irin shirin “Nigeria for Women Project,” inda sama da mata 4,000 za su baje kolin sana’o’insu, yayin da 2,200 za su samu tallafin kuɗi.
Taron ya haɗa jami’an gwamnati, ‘yan kasuwa, masu ƙirƙire-ƙirƙire da matasa domin musayar dabaru da neman hanyoyin bunƙasa sana’o’i da kasuwanci masu ɗorewa a jihar Katsina.
__________
