Ko Me Ya Sa Manyan Mata Ke Auren Yara?
__________
Related posts
Akwai mamaki yadda za ka ga matashi ya auri bazawarar da ta yi sa’ar mahaifiyarsa ko ma kakarsa. Shin waɗanne dalilai suke haifar da haka? Marubuciyar Hausa, Sa’adatu Saminu Kankia ta tofa albarkacin bakinta a kan wannan al’amari kuma ga abin da take cewa:
__________
Ba kowa ke fahimtar matsalar mace bazawara ba sai wadda take cikin irin matsalar.
Su mazan da ake ganin su ne daidai da ita, ai ba auren ke kawo su ba. A cikin mutum biyar idan ta laluba, ba za ta iya samun ɗaya ƙwaƙƙwara ba, wanda ya zo da niyyar aure.
Su waɗanda ake wa kallon cewa ba su dace da ita ba, ko kuma ake wa kallon cewa yara ne, su ne masu zuwa da kyakkyawar zuciya da manufa ta alheri. Kuma da yawansu ba su iya tunkarar macen da ta girme su da wata manufa ta daban.
Don haka zaɓi uku ne ga babbar mace bazawara: Ko dai ta auri yaro a zage ta, a ce ta yi girman banza, ko kuma ta tsaya jiran babba daidai ita; waɗanda kuma su zage ta, suna raina mata hankali da yaudara kalala. Ko kuma ta ƙi yin auren, mutane su ci gaba da zaginta, suna cewa ta ƙi aure. Idan ta fita yawo, a riƙa ce mata karuwa.
Gare ku masu karatu: Ku a ganin ku, wane dalili ne ke sanya manyan mata suke auren matasa, maimakon tsofaffi, sa’anninsu? Ku bayyana ra’ayinku a Comment Section.
__________
