MENE NE SO?
Related posts
•••••
So, so, so! Shin wai mene ne so? Shin akwai so ɗin ma, ko kuwa dai tunanin mutane ne kawai yake riya masu batun so a zukatansu? Shin mene ne bambancin so da ƙauna da sha’awa? Waɗannan tambayoyi, har ma da wasunsu za mu duba, tare da yiwuwar amsa su a wannan muƙala. Idan hali ya samu, za mu ɗora da ƙarin bayani tare da sharhi ko tsokaci a kan wannan maudu’i.
Shi dai so wani tsikari ne ko shauƙi mai zurfi da ke shiga cikin ruhin mutum kuma yake samun tasiri sosai a ruhi, har ma ya haifar da wata halayya ta musamman ga mutumin da ya faɗa cikin so. A yayin da wasu kuma suka ce shi so zaɓi ne wanda ke samuwa a zuciyar mutum kuma yana haifar da shaƙuwa da sadaukarwa, kulawa da tattali da kiyayewa da makamantansu.
Haka kuma shi so yana zuwa ne cikin siffofi iri-iri. Akwai so na tarayya, wanda shi ne yake ɗarsuwa saboda sha’awa. Shi ne yake haddasa buƙatar saduwa ko jima’i.
Akwai so na haka nan ba tare da wani dalili ba. Shi irin wannan son yana faruwa ne saboda halayyar ɗan Adam. Haka kawai za ka ga wani ko wata, babu wani dalili sai ka ji kana son ta ko son shi.
Akwai kuma so na dalili. Shi irin wannan son yana sargafuwa ne bisa wani ayyanannen dalili. Misali shi ne so irin na addini ko ƙabila ko saboda wata bajinta ko ƙwarewa a wata sabgar rayuwa, kamar ƙwallon ƙafa da sauran wasanni ko fim da sauransu.
Akwai so na sanayya. Wannan shi ne yake ginuwa saboda sanayya ko nasaba ta jini – ‘yan uwantaka. Wannan shi ne kamar son da ke tsakanin mahaifa da ‘ya’yansu, ɗan uwa da ɗan uwa da sauransu.
Akwai kuma son kai, wanda shi ma nau’in so ne mai zaman kansa. A haka za ka ga wani ko wata da suka siffatu da son kansu fiye da kowa.
So wani irin shu’umin al’amari ne, domin kuwa yana haifar da farin ciki da natsuwa. Yana haifar da ƙalubale a rayuwa, kamar kuma yadda a wasu lokuta yake haifar da ƙunci da matsaloli.
•••••
A rubutu na gaba, za mu duba tambayar da ke cewa, shin akwai SO, ko kuwa dai tunanin mutum ne kawai yake haska batun so a zuciya? Kafin sannan, ku shiga Comment Section ku bayyana ra’ayinku, shin me kuka fahimta game da so?
•••••
