GODIYA DA JINJINA GA BABANA: Bashir Yahuza Malumfashi
•••••••
Alhamdulillah! A yau na tsaya cikin farin ciki da annashuwa domin na kammala karatuna a jami’a. Wannan rana ta zama wani sabon babi a rayuwata, amma kafin in yi murnar wannan nasara, wajibi ne in fara yin godiya ga wanda ya fi kowa cancanta – mahaifina.
Related posts
Baba shi ne silar wannan farin ciki. Tun daga ƙuruciyata har zuwa yau, shi ne ya ɗauki nauyina, ya yi sadaukarwa da zuciya ɗaya domin ganin burina ya cika. Ya ɗauki nauyin karatuna daga firamare, ya jure har zuwa sakandare, kuma ya ci gaba da ba ni dukkan goyon baya har zuwa matakin jami’a. Duk inda na kai yau, ba wai da ƙarfina ba ne, da addu’a da jajircewar Baba ne.
Akwai lokuta da dama da Baba ya ƙi jin daɗinsa saboda ya tabbatar ni ina cikin farin ciki. Akwai lokuta da ya manta da buƙatunsa domin ya ciyar da ni. Ya yi sadaukarwa da dukiyarsa, ƙarfinsa da lokacinsa domin tabbatar da cewa ni ina da makoma. Idan zan yi lissafi, kalmomi ba za su isa bayyana irin alherin Baba ba.
Wannan digiri da na samu a yau, ba wai nasarata ce kawai ba, ita ce nasarar Baba. Nasarar haƙurinsa, jajircewarsa, da ƙaunarsa. Idan da zan iya, zan rubuta sunan Baba a jikin wannan takardar shaidar kammala karatu, saboda shi ne ya fi cancantar a yaba masa.
Babana, a yau ina cewa: Na gode ƙwarai da gaske. Allah ya saka maka da mafificin sakamako, ya ba ka lafiya da natsuwa, ya tsawaita rayuwarka cikin albarka. Duk inda zan kai a rayuwata, ina yi maka alƙawari cewa zan riƙa tunawa da irin wannan sadaukarwa taka, kuma zan yi ƙoƙari in kasance abin alfahari gare ka.
Wannan rana ba wai ranar tawa ce kaɗai ba, ita ce ranar farin cikinmu gaba ɗaya. Na kammala jami’a, amma kai ne na farko cikin waɗanda suka kammala tare da ni. Allah ya saka maka da gidan aljanna, ya bar mu tare cikin farin ciki da albarka.
_______________
