ALLAH YA JI ƘAN ASP ALHAJI ƊAHIRU
Related posts
_______________
Inna lillahi wa inna ilaihi raji’un!
A jiya Talata, 01-04-1447 (Hijiriyya), 23-09-2025 (Miladiyya) al’umma suka taru suka yi wa jami’in ɗan sanda, marigayi ASP Alhaji Ɗahiru Sallar Jana’iza (Gaib), alhali gawarsa na can tare da azzaluman da suka zalunce shi.
Shi dai wannan bawan Allah, ibtila’in ‘yan bindiga ne ya hau kansa, inda ba tare da ya san hawa ba balle sauka, suka kama shi, suka tafi da shi inda suka ga dama. Ya kwashe tsawon sama da makwanni bakwai, ba tare da sun sako shi ba.
Tun da farko, azzaluman sun rutsa da marigayin ne a gonarsa da ke Marabar Dayawa, suka kama shi, suka tafi da shi, kamar yadda suka saba yi a yankin Malumfashi, Ƙanƙara, Bakori, Funtuwa da sauransu. Ba shi kaɗai ba, kamar yadda rahotanni suka tabbatar, sai da suka fara halaka mai kula masa da gonarsa.
A tsawon zamansa a wurinsa, kafin su halaka shi, sun nemi kuɗin fansa daga iyalansa, amma ba a kai ga cin ma matsaya ba, labari ya tabbatar da cewa sun gama da shi kuma babu batun samun gawarsa.
Marigayi Ɗahiru dai ya samu shaida ta ƙwarai. Waɗanda suka san shi kuma suka yi mu’amala da shi, sun tabbatar da cewa shi mutum ne sahihi, wanda babu ruwansa da shiga sabgar da ba tasa ba. An shaidi cewa shi mutum ne mai nagarta.
Muna roƙon Allah ya ji ƙan shi da rahama. Allah ya saka masa bisa wannan zalunci da suka yi masa.
_______________
