Illolin Yaɗa Hotuna Da Bidiyon Aika-Aikar ‘Yan Ta’addar Daji
Daga Bashir Yahuza Malumfashi
__________
Jama’a, ko kun lura da abin takaicin da ya mamaye Sososhalmidiya, inda mutane suke yayata hotuna da bidiyon ta’annatin ‘yan ta’adda? Yin hakan ba burgewa ba ne kuma ba abu ne mai amfani ba, domin kuwa yana ƙara barazana da tsoro ga al’umma.
Wasu da dama ba su san illar yin haka ba. Wasu kuma kamar Hausawan Bogi ‘Yan Bazata, da gangan suke yaɗawa wai da sunan ɓata Fulani kuma da niyyar zuzuta wutar ƙabilanci.
Wannan dabara ta yi kama da abin da marubucin littattafan bincike da kasada, James Hadley Chase ya nuna a cikin littafinsa mai suna “Want to Stay Alive?” A cikin labarin, baƙin tauraron labarin mai taken “The Executioner” ya yi amfani da dabarar “emotional blackmail” domin ƙara tsoratar da mutane da kuma kambama ƙarfinsa na ta’addanci. Haka ma ‘yan ta’adda kan yi amfani da hotuna da bidiyoyinsu domin gina wani yanayi na tsoro da firgici a zukatan jama’a.
Duk wanda ya yaɗa hotuna ko bidiyon ta’addanci, yana ƙara bunƙasa su ne, a gefe ɗaya yana ƙara saka tsoro a zukatan al’umma. Ke nan ana nuna cewa, su ‘yan ta’adda sun yi nasara kuma sun fi ƙarfin kowa.
A cikin ‘yan kwanakin nan, yaɗa hotuna da bidiyon aika-aikar ‘yan ta’addar daji ya zama ruwan dare a kafafen sada zumunta da sauran hanyoyin sadarwa. Duk da cewa wasu suna yin hakan ne domin sanar da jama’a halin da ake ciki, akwai babbar illa da ke tattare da wannan ɗabi’a wadda mutane da dama ba su fahimta ba.
Abu na farko shi ne cewa yaɗa irin waɗannan hotuna da bidiyo yana taimakawa wajen tallata ayyukan ‘yan ta’addan kansu. A mafi yawan lokuta, manufar masu ta’addanci ita ce su ja hankalin jama’a, su nuna ƙarfinsu, kuma su sa a riƙa magana a kansu. Idan aka ci gaba da yaɗa abubuwan da suke samarwa, ana taimaka musu wajen cin ma wannan buri.
Na biyu, irin wannan yaɗawa yana ƙara tsoro da firgici a zukatan jama’a. Mutane da dama kan shiga cikin damuwa da rashin kwanciyar hankali idan suna kallon bidiyoyin kisa, garkuwa da mutane ko kuma nuna makamai. Wannan kuwa na iya haifar da matsalolin tunani da ƙekashewar zukata da rashin jin tsaro a cikin al’umma.
Haka kuma, yaɗa hotunan ta’addanci na iya sanya jama’a su fara ganin cewa gwamnati da jami’an tsaro ba su da ikon shawo kan matsalar. Lokacin da ake ci gaba da ganin bidiyoyin ‘yan ta’adda suna yawo ba tare da wani martani mai ƙarfi ba, hakan kan haifar da tunanin cewa su ne suka fi ƙarfin hukuma.
Wata illa mai girma ita ce yadda wasu mutane ke amfani da irin waɗannan hotuna domin tayar da ƙiyayyar ƙabila ko addini. Sau da yawa ana ɗora laifin wasu mutane kaɗan a kan wata ƙabila gaba ɗaya, lamarin da ke haifar da rabuwar kai da rashin zaman lafiya tsakanin al’ummomi.
Akwai kuma waɗanda ke yaɗa irin waɗannan bayanai da gangan domin su cin ma wata manufar siyasa ko ta zamantakewa. Wasu kan yi amfani da su wajen tayar da hankali, tada husuma ko kuma karkatar da hankalin jama’a daga ainihin hanyoyin magance matsalar tsaro.
Bugu da ƙari, yawaitar kallon irin waɗannan abubuwa na iya sa wasu matasa su fara ɗaukar masu aikata laifukan a matsayin jarumai ko masu iko. Wannan tunani mai haɗari ne wanda zai iya jawo wasu su shiga irin wannan tafarki ko kuma su nuna sha’awa ga ayyukan ta’addanci.
Masana harkokin tsaro da sadarwa sun daɗe suna jaddada cewa ya kamata a kula sosai wajen yaɗa bayanan da suka shafi ta’addanci. Maimakon yaɗa hotuna da bidiyoyin da ke ƙarfafa manufar ‘yan ta’adda, ya fi dacewa a mayar da hankali kan bayanan da ke ƙarfafa gwiwar jama’a, haɗin kai da kuma nasarorin da jami’an tsaro ke samu.
Ina son a san cewa, duk wanda ya yaɗa hotuna ko bidiyon ‘yan ta’adda ba tare da tunani ba, yana iya kasancewa mai taimakawa wajen bunƙasa manufarsu. A gefe guda yana ƙara yaɗa tsoro da firgici a cikin al’umma. A gefe guda kuma yana ba su damar nuna kansu a matsayin waɗanda suka yi nasara. Saboda haka, wajibi ne mu yi amfani da kafafen sadarwa cikin hikima, mu guji zama kayan aikin yaɗa farfagandar masu ta’addanci kuma mu fifita haɗin kai da zaman lafiya a cikin ƙasa.
__________
