Jan Hankali Ga Shugabanni
Daga Bashir Yahuza Malumfashi
Related posts
•••••••
Ya kai MUTUM, ka zama mai taka-tsan-tsan da rayuwa, domin kuwa babu abin da ke tabbata. Komai daɗewar halitta, wata rana za ta gushe. Idan kana son babban misali, ka kalli JARIRI kuma ka kalli GAWA. Ɗaya zuwa ya yi yanzu, ɗaya kuma tafiya ya yi. Ko ka gane darasin haka?
Tafiya sannu-sannu kwana nesa. A duk lokacin da ka fara wani abu, sannu za ga ka kammala shi. Misali kana ɗan siyasa, a ce an zaɓe ka kan wani muƙami, Shugaban Ƙasa, Gwamna, Ɗan Majalisa ko Shugaban Ƙaramar Hukuma, bayan wani lokaci, sai ka ji ana cewa saura kwanaki kaza ka sauka; ko dai a sake zaɓenka ko kuma shi ke nan har abada.
Ya kai ɗan siyasa, ka sani cewa Hausawa suna cewa, gani ga wane ya isa wane tsoron Allah, kamar kuma yadda suka ce, abokin damo kuza. Me nake nufi da waɗannan batutuwa? Ina nufin ya kamata ka ɗauki izna kuma ka ɗauki misali da wasu ƙasashe da wasu ‘yan siyasa na wasu ƙasashe.
A lokacin da ka samu kanka bisa kujerar mulki, ka yi abota da ƙasar da za ta ƙarfafi ƙasarka ta fannonin kirki. Kada ka yi ƙawance da ƙasa ko Shugaban Ƙasar da zai cuci al’ummarka. Kuma ka aikata abin da ya dace, tun kafin wa’adin mulkinka ya ƙare.
Ka sani cewa Shugaban da ke kishin al’ummarsa shi ne ke fita waje ya jawo wa ƙasarsa arziki, ba wai ya gayyato mata tawagar ‘yan ta’adda ba. Ka zama mai ƙudurin alheri ga al’umma.
Ya kai ɗan siyasa, ya kamata ka bambanta da wasu kurayen shugabanni da ke kwashe dukiyar talakawa su kai ƙasashen waje su kimshe. Wannan kashe ƙasa ne, kashe al’umma ne. Ka sani, dabba ma fita take daga gidanta, ta samo albarka ta kawo gida, ba wai ta ɗauki na gidanta ta kai waje ba.
Ya kai mai son mutane su zaɓe ka a matsayin SHUGABA, ka zama mai kishin ƙasa kuma mai kishin al’ummarka. Ka sani, komai daɗewa, akwai ƙarshe.
_______________
