Abin Lura Game Da Bazuwar ‘Yan Kasuwar Sola Da Janareta A Najeriya
•••••••
A cikin ‘yan shekarun nan, al’ummar Najeriya sun shiga wani sabon yanayi na dogaro da hasken rana wajen samar da wuta, sakamakon matsalar rashin wadatacciyar lantarki. Amma abin takaici, rahotanni da zargi suna yawo cewa wasu gurɓatattun ‘yan kasuwar solar panels suna haɗa kai da baragurbin ma’aikatan lantarki domin su gurgunta samar da wutar gwamnati. Wannan ya zama wata hanya ta kasuwanci mai hatsari ga ci gaban tattalin arzikin ƙasa da kuma walwalar jama’a.
Akwai alamun cewa wasu daga cikin waɗannan ma’aikata suna tozarta aikinsu, ta hanyar rashin gyara layin lantarki yadda ya kamata, ko kuma ta hanyar ƙirƙirar matsaloli don ganin mutane sun fi karkata ga amfani da kayan solar. A sakamakon haka, an wayi gari kasuwanci da sayar da solar panels ya karu fiye da ƙima, inda ake shigo da sabbin kayayyaki daga ƙasashen waje a kowane mako. Wannan bai zama alheri ba idan ana yin hakan ne bisa cutar da jama’a.
Yanzu haka, kowane yanki na ƙasar nan, daga Arewa zuwa Kudu, ana tallar solar panels, inverters, da baturori. Wannan ya nuna cewa akwai wata alaƙa tsakanin rashin wutar gwamnati da haɓakar kasuwancin solar. Idan aka bincika da kyau, za a ga cewa mutane sun daina sa ran samun wutar gwamnati saboda sun gaji da rashin tabbas, wanda ya sa suka rungumi solar da hannu bibbiyu. Amma idan akwai wata maƙarkashiya a bayan wannan, to lallai gwamnati ta sa baki.
Haka kuma, wannan matsala tana da illa mai tsanani ga tattalin arzikin ƙasa. Domin yawancin kayan solar da ake amfani da su ana shigo da su ne daga ƙasashen waje, wanda ke nufin kuɗin Najeriya na fita zuwa wajen ƙasa. Idan ma’aikatan lantarki suna da hannu a wannan maƙarƙashiya, to suna cutar da ƙasa ruɓi biyu, ta hanyar tozarta aikin gwamnati da kuma haifar da asarar tattalin arziki.
Akwai buƙatar hukumar samar da lantarki ta Najeriya, ta gudanar da cikakken bincike kan wannan zargi. Dole ne a tantance dalilin da ya sa wasu wurare ke zama cikin duhu na tsawon watanni, alhali ana karɓar kuɗin wuta a kowane lokaci. Idan aka gano akwai hannun wasu ma’aikata a wannan ɗanyen aiki, to wajibi ne a hukunta su domin zama izina ga sauran masu tunanin yin irin haka.
Haka kuma, gwamnati ta tarayya da ta jihohi su ɗauki matakai na gaggawa don gyara tsarin samar da wuta a Najeriya. Ya kamata a mayar da hankali wajen inganta kayan aiki, horar da ma’aikata da kuma tabbatar da cewa ana gudanar da aiki bisa gaskiya da amana. Bugu da ƙari, ya kamata a ƙarfafa bincike kan hanyoyin samar da wuta ta hanyoyin zamani ba tare da cutar da jama’a ko ƙasar gaba ɗaya ba.
Wannan batu na haɗin kai tsakanin wasu ‘yan kasuwar solar da baragurbin ma’aikatan lantarki ya kamata a ɗauke shi da muhimmanci. Idan gwamnati ba ta sa baki yanzu ba, to al’ummar Najeriya za su ci gaba da rayuwa cikin duhu, yayin da wasu ke tara dukiya bisa cutar jama’a. Gwamnati da kamfanin lantarki na Najeriya su tashi tsaye don gyara wannan lanari, su dawo da amincewar jama’a, kuma su tabbatar da cewa wutar lantarki ta zama haƙƙin kowa, ba kasuwanci na wasu mutane ƙalilan ba
_______________
