TSOKACINMU NA YAU (13)
Yau Alhamis, 13-Ramadan-1446, Hijirar Manzon Allah (saw), wacce ta yi daidai da 13-Maris-2025, Miladiyya.
Ga tsokacinmu na yau:
“Ya ku ‘yan uwa, a tsokacinmu na yau, za mu yi tambihi ne dangane da gaskiya, wacce masu hikima suka ce ta fi kwabo. A falsafar rayuwa, gaskiya babban tubali ne na gina ƙaƙƙarfan ginshiƙin gida mai aminci a rayuwar mutum. Har kullum ita gaskiya ita ce babban sinadarin ci gaba, tufafin rufe tsiraicin mutum, wacce ke ba shi mutunci da kariya a kowane yanayin rayuwa.
Masu hikima sun ce, har kullum ba za a taɓa cewa gaskiyar mutum ta ƙare ba, sai dai a ce ƙarya ta ƙare. Don haka mu tabbatar mun kasance masu gaskiya a kowane turbi na rayuwa.”
Allah sa mu dace, Amin.
Mu wuni lafiya.
Naku,
Bashir Yahuza Malumfashi,
Editan Mujallar Taskar Gizago.
