SHERIF ALMUHAJIR: JAMA’A YA KAMATA MU MUTUNTA JUNA
Daga Bashir Yahuza Malumfashi
Na wayi gari da safiyar yau, na ga yadda ake ta kwarmato tare da yamaɗiɗi da suna tare da keta mutuncin Dokta Sherrif Almuhajir.
Daga bisani ma sai na ga shi da kansa ya fito yana bayyana ba’asi tare da barranta kansa da wannan ƙazafi da aka ƙaƙaba masa.
Ya kawo hujjoji da suke tabbatar da cewa “wani” ko “wasu” ne suka shiga rigar sunansa da hotonsa, suka yi amfani da fasahar takanolaji, suka shirya wannan tattaunawa, tsakaninsa da “wata.”
A cewar sa, sun yi haka ne domin cin zarafi da neman tozarta shi a idon duniya. Bisa kan haka, har ya nuna cewa ya shigar da ƙorafi ga hukuma, domin ɗaukar matakin da ya dace.
Na bibiyi da dama daga cikin waɗanda suka zaƙalƙale wajen kururuta al’amarin tare da yaɗa shi. Na fahimci cewa da yawa daga cikinsu, har ga Allah sun san cewa al’amarin nan ba gaskiya ba ne, amma saboda suna da wani “SAƁANI” da shi, shi ya sanya suka ara suka yafa da nufin huce haushi.
Ni a gani na, ba daidai ba ne domin kana da saɓani da wani amma ka fito kana tozarta shi bisa ƙarya da ƙage, kawai domin ka daɗaɗa wa zuciyarka.
Tabbas, duk wanda ya san Almuhajir, ya san shi da shiga al’amuran wasu gaba-gaɗi, sannan kuma bai da juriyar suka ko kaɗan. A kan haka ya ɓata da mutane da dama, ya yi bulokin mutane da dama (ciki har da ni, a shekarun baya). Amma duk da haka, wannan ba hujja ba ce, mutum ya maida mugunta da wata muguntar.
Kuma tabbas, ina da tabbacin lallai za a iya ƙirƙirar chatin na bogi ta hanyar WhatsApp ko Facebook Messenger da suna da hoton duk wanda ake so. Ba chatin kaɗai ba, a wannan zamanin hatta hotunan bidiyon bogi, za a iya ƙirƙira a kan wani ko wata.
SHAWARA:
Abin da duk ba ka so a yi maka, don Allah ka daure, kada ka yi wa waninka. Domin idan yau shi aka yi wa haka, akwai yiwuwar gobe kai ma a yi maka ko kuma wani naka. Shin idan haka ta faru da kai, yaya za ka ji?
Kada fa mu manta, mu ‘YAN ADAM ne, cike muke da ayyukan assha na zahiri da na ɓoye. Idan Allah Ya rufa mana asiri, to me zai sa mu mu shiga tona wa waninmu asiri?
Daga ƙarshe, don Allah mu daure mu riƙa danne zukatanmu wajen huce takaicin junanmu, domin gaba ta fi baya yawa. Za ka iya saɓani da mutum a yau, gobe kuma ya zama amininka. BABU ABIN DA YA GAGARI ALLAH!
ALLAH YA SA MU DACE – AMIN!
__________
Bashir Yahuza Malumfashi,
Babban Editan Mujallar Taskar Gizago (online)
