GASAR ƘIRƘIRA: Pharmacist Isa Ya Ci Kyautar Naira Miliyan 10
Daga Pharm Musa A. Bello
~~~~~~~
Pharmacist Isah Ɗahiru ya ci gasar fasaha ta ƙirƙira da Hukumar Kula Da Al’amuran Sadarwa (NCC – Nigerian Communications Commission) ta shirya, inda ya samu kyautar Naira miliyan goma.
Malam Isa ya ci wannan gasar ce a sakamakon ƙirƙira da ya yi na wani abin taimako ga masu matsalar rashin iya riƙe fitsari, a sanadiyyar dalilai kamar tsufa, rashin lafiya da sauransu, wacce ya sanya wa suna “Smart Bladder.”
Smart Bladder dai an tsara ta ne kamar Pampers, wacce ake sa wa amma tana da kimiyyar da ke bai wa mutum damar sarrafa aikin mararsa.
“Wannan fasaha ce mai ban sha’awa da ta kasance irin ta ta farko da aka taɓa ƙirƙira a wannan nahiyar tamu. Muna alfahari da shi da wannan ƙirƙira tasa.” In ji masanin magunguna, Pharm Musa A. Bello.
Game da Malam Isah Ɗahiru kuwa, Malam Musa ya ce “ɗan ajinmu ne a Jami’ar Ahmadu Bello Zaria kuma tare muka kammala karatu. Saboda haka wannan nasara ta dukkan ‘yan ajinmu na U13PH ce da mutanen Arewa da Najeriya gaba ɗaya.
“Tabbas al’ummarmu akwai fahasa. Allah Ya taimaka. Jama’a ku taya shi murna, domin alfahari da shi a matsayin ɗan Arewa, ɗan Najeriya, ɗan Afrika.”
~~~~~~~
