MAGAJI GALADIMA: Yau Ne Maulidin Magayaƙin Kano
~~~~~~~
A yau Juma’a, 14-03-1445 (Hijriyya) = 29-09-2023, ita ce ranar haihuwar mai girma HAKIMI, MaGAYAƘIN KANO, Malam Magaji Galadima.
Kasancewarsa shahararren mutum a fagage da dama, lallai ne mu shiga cikin ‘yan uwa da abokan arziki wajen taya shi addu’a a wannan rana.
Magaji Galadima, Saraki ne da ya san kan al’amuran sarauta. Ɗan jarida ne da ya san ciki da wajen jaridanci. Malami ne da ya san hagu da dama. Bahaushe ne da ya san al’adar Hausa, ya san adabin Hausa kuma ya san kinayar Hausa.
Mutum ne da ya san yakamata, mai mutunci da zumunci da karimci kuma mai mutunta zumunta.
A madadin ‘yan uwa da abokan arziki. Muna taya Magayaƙin Kano, Malam Magaji Galadima murnar ganin wannan muhimmiyar rana. Muna addu’ar Allah Ya ƙara maka lafiya da imani a sauran ranakunka na duniya!
Ni ne naka da zumunci da ladabi.
~~~~~~~
Bashir Yahuza Malumfashi,
Fasihin Galadiman Katsina-1
Babban Editan Taskar Gizago
~~~~~~~
