Jiya Lamine Yamal Ya Yi Wasan Kura Da Mbappé
Daga Bashir Yahuza Malumfashi
__________
A jiya Talata aka fafata wasan farko na Gab Da Na Ƙarshe tsakanin Spain da France, inda matashin ɗan wasa, Lamine Yamal ya sake nuna bajintarsa.
Kodayake bai zura ƙwallo a raga ba amma ya wujijjiga Kyaftin ɗin France, Kaylian Mbappé. Kuma shi ne ya haddasa bugun fanarati da Spain ta samu ta zura ƙwallo ta farko. Sannan ya kasance cikin manyan dalilan da suka sa Spain ta mamaye wasan kuma ta yi nasara da ci 2–0, kamar kuma yadda ta samu nasarar kai wa wasan ƙarshe na Gasar Kofin Duniya ta bana.
A gasar ta bana, Yamal ya tabbatar wa duniya cewa ba kawai matashi ne mai hazaƙa ba, har ma ya nuna cewa shi ɗan wasa ne mai ɗaukar nauyin manyan wasanni. Ya taka muhimmiyar rawa tun daga matakin rukuni har zuwa wasannin kifa-ɗaya-ƙwala (knockout), inda ya kasance cikin fitattun ‘yan wasan ƙasar Spain.
A Zagayen ‘Yan 32, ya taimaka wa Spain ta doke Austria da ci 3–0. Daga nan kuma ya ci gaba da nuna ƙwarewarsa a wasan Zagayen ‘Yan 16, inda Spain ta doke Portugal da ci 1–0.
A wasan Kwata Fainal kuwa, ya taka rawar gani wajen taimaka wa Spain ta doke Belgium da ci 2–1, abin da ya tabbatar da cewa yana iya taka rawa a manyan lokuta.
Masu hasashe sun bayyana cewa, akwai yiwuwar Yamal da ƙasarsa ta Spain su lashe wannan kofi na bana, muddin dai suka murza leda, irin yadda suka lallasa France a wasan na jiya.
Jama’a, yaya kuke ganin wannan ƙwazo na Yamal da ƙungiyarsa ta Spain? Kuna ganin za su iya maimaita wannan ƙoƙari a wasansu na ƙarshe? Kuma shin, ko za su iya ɗaukar Kofin Duniya na bana? Ku bayyana ra’ayinku a Comment Section.
__________
