Burina In Samar Da Maslaha Tsakanin Ma’aurata – LIKITAR MA’AURATA
Daga Binta Tukur
~~~~~~~
Malama Zuwaira Dauda Kolo, marubuciya ce da ta sha bamban da gamagarin marubuta. Baya ga kasancewarta Ma’aikaciyar Lafiya, ta kasance kuma Malamar Sassaita Matsalolin Ma’aurata. A tattaunawarta da BINTA TUKUR, ta bayyana irin gwagwarmayar da take sha a fagen rubuce-rubuce da kuma tagomashin da take samu. Ga bayanan Likitar Ma’aurata:
~~~~~~~
TG: Kina ɗaya daga cikin manyan marubutan Hausa, ko za ki gaya mana tarihinki a taƙaice?
ZUWAIRA: Sunana Zuwaira Dauda Kolo. NI haifaffiyar garin Jos ce, ma’aikaciyar lafiya. A yanzu haka ina Jami’ar Jos, inda nake ƙara karatu kan aikin nawa, domin sake samun ƙwarewa.
TG: Tun yaushe kika fara rubutu kuma mene ne ya ja ra’ayinki ga harkar rubuce-rubuce?
ZUWAIRA: Na fara rubutu a shekarar 2005 amma ban buga littafi ba sai a 2007, sannan ya shiga kasuwa.
Abin da ya ja hankalina na fara rubutu, gaskiya a lokacin yana da nasaba da karance-karancen da nake yi, wanda ta kai har na fara sha’awar ni ma a ce na samar da wani ɗan kundi da zai aika saƙo ga al’umma kuma musamman kan abin da ya shafi zamantakewa. Cikin hukuncin Allah kuma sai ga shi ina fara gwadawa sai abin ya riƙa tafiya yadda ake so.
TG: Ya zuwa yanzu, littattafai nawa kika rubuta? Guda nawa aka buga a littafin takarda kuma nawa kika buga a intanet?
ZUWAIRA: Na rubuta littattafai da dama gaskiya kuma kusan duk an buga su. Littattafan sun haɗa da kamar su Mardiyya, Bulalar Zuciya, Taya In Mu Gyara, Ƙanin Ajali da sauransu.
Littattafai a internet kuwa ai ba za su ƙirgu ba, tun da kusan kullum akan hakan ake.
TG: Waɗanne irin matsaloli kike fuskanta a matsayinki na marubuciya, musamman ma a soshalmidiya?
ZUWAIRA: Matsaloli ba zan iya cewa ga su ba, sai dai ba za a rasa ‘yan ƙananan ƙalubale ba gaskiya, musamman wani post ɗin da in ka yi wasu kan nuna ka goyi bayan wani ɓangare, a dinga ƙoƙarin sai an taɗe ka. To amma hakan dai ba zai hana mu yin abin da muka kan yi ba.
TG: Tun daga fara rubutu, waɗanne irin nasarori kika samu ko kuma akasin su?
ZUWAIRA: Gaskiya ni kam a yanzu ba zan iya lissafta nasarorin da na samu ba, domin suna da yawa. Abubuwan da ban taɓa tunanin samu ba na samu, garuruwan da da sai dai na ji su a labari sanadin rubutu na je su, mutanen da ban tunanin haɗuwa da su ba ko a mafarki, Alhamdu lillahi, na haɗu da su. Mu da rubutu sai dai mu ce Alhamdu lillah.
TG: A harkar rubuce-rubuce, waɗanne marubuta ne gwanayenki, da kike koyi da rubutunsu?
ZUWAIRA: Akwai irin su Rahma Abdulmajid, Maryam Kabir Mashi, Sadiya Garba Yakasai. Maimuna Idris Sani Beli, Fauziyya D. Sulaiman, KMashi da sauransu.
TG: Baya ga harkar rubutu, kin tsunduma cikin harkokin tallafa wa al’umma don inganta zamantakewar aurensu. Ta yaya kika faro wannan kuma ko za ki yi mana cikakken bayani game da babban ƙalubalen wannan aiki?
ZUWAIRA: Dama mu kullum cikin hidimar al’umma muke, musamman kasancewata ma’aikaciyar lafiya, hakan ya sa ina da alaƙa sosai da mutane. Wani yadda zai zauna ya faɗa maka matsalarsa da neman shawararka to ta hakan ake ƙoƙarin nema wa mutane mafita, wanda ta hakan ma aka fara gaskiya. Sai fatan Allah Ya ba mu dacewa.
TG: Kina daga cikin marubuta, me za ki ce game da haka?
ZUWAIRA: Na gode wa Allah da na tsinci kaina cikin marubuta, domin marubuci wani madubi ne cikin al’umma, wanda duk wanda Allah Ya yi masa wannan baiwar, yana iya samar da abin da zai iya canja al’ummar da ta kauce hanya ta hanyar rubutu.
TG: Mene ne babban burinki dangane da rubutu da kuma zamantakewar aure?
ZUWAIRA: Babban burina a rubutu, na ɗore da saƙon da nake aikawa kuma ma’auratan su ci gaba da fahimtata suna samun daidaito tsakaninsu. Ina son ma’aurata su karɓi rayuwar aure a duk yadda ya zo musu. Komai na rayuwa ɗan hakuri ne, dama kusan haƙurin ne a cikin aure.
TG: Ko kina da wani kira ga gwamnati da marubuta ‘yan uwanki da kuma al’umma masu karanta littattafanki da sauran al’ummar da kike ba shawarwari?
ZUWAIRA: Ina kira ga gwamnati, da ta dinga saka marubuta cikin ƙusoshin gwamnati, domin suna da gudunmawar da ya kamata su bai wa al’umma ta hannun gwamnati. Ga makaranta masoyanmu kuwa, ina kira da su ci gaba da haƙuri da bibiyar rubutunmu. Inda aka ga mun yi kuskure kuma a gyara mana don Allah.
