Rage Raɗaɗin Talauci: Attajirai Ku Yi Koyi Da Sabi’u Mahuta
Malam Abba Mahuta ya yi kira da babbar murya ga attajirai da su yi koyi da attajirin ɗan siyasa, Alhaji Sabi’u Sa’idu Mahuta, wajen amfani da dukiyarsu wajen tallafa wa mabuƙata da kayan abinci, domin rage masu raɗaɗin ƙuncin rayuwa da ake ciki.
Da yake bayyana aikin alherin da attajirin ya yi a yankinsa na Mahuta da ke Ƙaramar Hukumar Ƙafur a Jihar Katsina, Abba Mahuta ya bayyana cewa:
“Domin rage raɗaɗin tdadar kayan abinci, Alhaji Sab’iu Sa’idu Mahuta ya sayi buhun masara 600, wadda ake sayar da kwano ɗaya a kan Naira 1,300, amma ya riƙa sayarwa a kan ₦500, kacal. Watau ya zaftare wa al’umma sama da kashi 61.5 cikin ɗari.”
Bisa haka, Abba Mahuta yake tunatar da attajirai da su yi amfani da dukiyarsu tausaya wa al’umma. “Tabbas duk wanda ya tausaya wa al’umma, musamman ta samun sauƙi wurin ciyarwa, Allah ne Ya san irin sakayyar da zai yi masa,” in ji shi.
Ya yi addu’a ga attajirin. “Allah Ya saka maka da mafificin alheri, Ya azurta ka da Aljannah Firdausi tare da iyayenka da iyalanka baki daya. Allah Ya yalwata mana masu arziki, ‘yan kasuwa da shugabannin da za su riƙa taimakon al’umma. Amin.”
