Daga Bashir Yahuza Malumfashi
Ali Nuhu Ya Shiga Rukunin Fitattun Taurarin Fim 100 Na Afirka
Wata cibiya mai suna Ranks Africa Top ta bayyana sunan shahararren ɗan fim ɗin Hausa, Ali Nuhu a ɗaya daga cikin fitattun ‘yan fim 100 mafi shahara a nahiyar Afirka a bana (2023).
Cibiyar, wacce ta ce tana kula tare da tantance irin waɗannan shahararrun ‘yan fim na Afrika ne, domin bunƙasa al’adun nahiyar da ci gaban al’umarta, tana gudanar da wannan tsari ne a kowace shekara.
“Mun zaɓi Ali Nuhu ne a matsayinsa na Fitacce a Afrika a fannin fitowa a finafinai da kuma yadda shi kansa yake shiryawa,” kamar yadda sanarwa daga cibiyar ta bayyana.
Ali Nuhu dai ya yi fice a fitowa cikin finafinan Hausa da ma na Ingilishi, da suka haɗa da Alaƙa, Shanty Town da kuma wani fim da yanzu haka tashar Netflix ke haskawa, mai suna The Plan.
