Daga Bashir Yahuza Malumfashi
Mujallar Forbes ta bayyana cewa a yanzu attajirin ɗan kasuwa, Johann Rupert, shi ne ya fi kowa kuɗi a Nahiyar Afirka. Ya doke attajirin ɗan kasuwa ɗan Najeriya, Alhaji Aliko Ɗangote, wanda ke rike da Kambin a baya.
Rupert babban ɗan kasuwa ne ɗan ƙasar Afirka ta Kudu. Ya ƙware sosai wajen zuba hannun jari a kamfanoni. An haife shi a ranar 1 ga Yuni, 1950, shekaru 73 da suka gabata.
Ya halarci Jami’ar Stellenbosche, inda ya karanta Ilimin Tsimi da Tanadi, daga bisani kuma ya karanta Ilimin Shari’a ta Fuskar Harkokin Kamfanoni. A 2008 kuma Jami’ar Nelson Mandela Metropolitan University ta ba shi Digirin Girmamawa.
Attajirin, wanda shi ne Shugaban Rukunin Kamfanonin Campaignie Financiere Richemont. An bayyana cewa mutum ne mai yawan kyauta da gudanar da ayyukan jin ƙai. Haka kuma yana da sha’awar wasannin motsa jiki, musamman ya kan yi ƙwallon golf.
