Daga Shanshani
Yau dai ni Shanshani na wayi gari da tsokana. Tsokana mana ga ɗaukacin mutanen da a can baya suka dame mu da cancakwaiwa da kwarmato game da wannan ɗan taliki da Maliki Yaumiddin Ya kaddara shi ne Shugaban Ƙasa.
Dole ne yau in tsokane ku, domin kuwa a nan zan iya tunawa, lokacin da ake tsaka da kamfen, tun ma kafin a kai ga zaɓen fidda gwani, kuma yi ta sakin baki kuna ɓarin zantukan guguwa.
Nan na ji wasu suna cewa ai mutumin laɗifi ne, ai tsoho ne, ya yi taushi kamar kaɗar auduga, ai kyarma yake…yen yen yen!
Abin mamaki, wai har ma da wasu”malaman addini” aka riƙa tafka wannan katoɓara. Nan na ji wasu na cewa, ai mutumin gawa ce da ke jiran rami. Ai wannan karkarwa yake, ba zai iya tsayuwa ba, ba zai iya saka hannu ga takarda ba…da sauran zantukan wofi.
Abin ikon Allah, yau gari ya waye, mutumin da kuke kyara da yi wa yarfe, shi ne Shugaban Ƙasa. Kuma kamar da ƙasa, wai in ji mai ciwon ido, ga shi nan sai ɓaro aiki yake yi.
Yau an wayi gari tsoho ya zama ƙaƙƙarfa ku kuma kun zama tuɓus-lakwaf! E, mana, haka Allah Ke nasa iko!
Daga naku Shanshani Mai Ƙafar Yawo, Aminin Gizago, Na Dodorido Uban Dodanni!
