Tarihin Rayuwar Sabon Shugaban Rundunar Sojojin Ruwa Na Najeriya Rear Admiral Idi Abbas
Daga Bashir Yahuza Malumfashi
•••••••
Rear Admiral Idi Abbas, sabon Babban Hafsan Rundunar Ruwa ta Najeriya, an haife shi a ranar 20 ga Satumba, 1969. Shi ɗan asalin Ƙaramar Hukumar Nassarawa da ke Jihar Kano ne. Ya shiga Babbar Makarantar Tsaro ta Najeriya (NDA) a ranar 12 ga Satumba, 1987, inda aka ba shi matsayin Sub-Lieutenant a ranar 10 ga Satumba, 1993, a matsayin ɗan Ajin 40 na NDA, tare da samun digiri na farko a fannin Chemistry.
Ya fara karatunsa a Makarantar Firamare ta Gwagwarwa, Kano, daga nan kuma ya tafi Airforce Military School, Jos, daga 1981 zuwa 1986, kafin ya samu gurbin shiga NDA a 1987.
Rear Admiral Abbas ƙwararren jami’i ne a fannin Dubarar Yaƙin Bisa Ruwa (Above Water Warfare-AWW), kuma ya halarci darussa da dama na soja a gida da waje. Wasu daga cikinsu sun haɗa da Sub-Lieutenant Technical Course a NNS QUORRA (1994), Junior & Senior Staff Courses a Armed Forces Command and Staff College, Jaji (2001 da 2005). Daga Janairu zuwa Disamba, 2003, ya halarci Officers’ Long Course (OLC XII) a NNS QUORRA, Apapa, Lagos, inda ya ƙware a fannin AWW. Ya kuma halarci United Nations Military Observer Course a Tanzania (2009), sannan ya kammala karatu daga National Defence College (NDC), Abuja, a 2014 (Course 23).
A rayuwar aikinsa, Rear Admiral Abbas ya riƙe muhimman muƙamai da dama a Rundunar Sojojin Ruwa ta Najeriya. Bayan an naɗa shi jami’i a 1993, ya yi aiki a jiragen ruwa da dama kamar NNS ARADU, NNS DAMISA, da NNS AYAM, a matsayin Watch-Keeping Officer. A 1998, ya zama Naval Assistant ga mataimakin kwamandan Armed Forces Command and Staff College, Jaji. Daga 1999 zuwa 2002, ya halarci wasu muhimman kwasa-kwasan soja, sannan ya koma aiki a NNS DAMISA. A Janairu 2004, ya zama Staff Officer III, Marine Services a Naval Headquarters, kuma daga baya Gunnery Officer a NNS OHUE (2006). A 2007, ya zama malami a NNS QUORRA, sannan a 2008, aka naɗa shi Commanding Officer na Burma Battalion a NDA.
Daga nan, Rear Admiral Abbas ya zama Base Administrative Officer a NNS PATHFINDER, sannan Naval Contingent Commander na Joint Task Force Operation SAFE HAVEN a 2010 da 2012. A 2015, aka naɗa shi Maritime Guard Commander (MGC) a NIMASA, sannan a 2017 ya zama Commander Task Group (CTG) na aikin Operation TSARE-TEKU. Daga 2018 zuwa 2022, ya yi aiki a Central Naval Command a matsayin Command Administrative Officer (CAO) da kuma Chief Staff Officer (CSO), kafin daga bisani a naɗa shi Flag Officer Commanding (FOC) Central Naval Command. A wannan lokaci kuma, ya shugabanci NNS VICTORY a Calabar (2020). A Yuli 2023, ya zama Chief of Naval Safety and Standards (CNASS) a Naval Headquarters, sannan a Fabrairu 2024, aka naɗa shi Chief of Defence Civil-Military Relations (CDCMR) a Defence Headquarters. A Janairu 2025, aka tura shi Nigerian Army Heritage Centre a matsayin Senior Research Fellow, kafin daga bisani a naɗa shi Babban Hafsan Rundunar Ruwa na 25 (25th Chief of the Naval Staff).
Rear Admiral Abbas gogaggen jami’in ruwa ne, kuma ƙwararren Seaman Executive Officer. Ya hau matakan muƙamai kamar haka: Midshipman (18 Satumba 1992), Sub-Lieutenant (1993), Lieutenant (1996), Lieutenant Commander (2001), da Commander (2006). Ya zama Navy Captain a Satumba 2011, Commodore a 2016, sannan Rear Admiral a 10 Satumba 2020.
Saboda girmamawa ga aikin da ya yi wa ƙasa, Rear Admiral Idi Abbas ya samu lambobin yabo da dama, ciki har da Passed Staff Course (psc), Fellow Defence College (fdc), Forces Service Star (fss), Meritorious Service Star (mss), Distinguished Service Star (dss), Grand Service Star (gss), da Defence General Service Medal (DGSM). Har ila yau, memba ne na Nigerian Institute of Management (NIM) da International Institute of Professional Security (IIPS).
Baya ga rayuwar aikin soja, Rear Admiral Idi Abbas yana da sha’awar buga ƙwallon gora da tuƙa mota. Musulmi ne mai bin koyarwar addini sau da ƙafa. Yana da matar aure ɗaya, Hajiya Aisha Abbas kuma Allah Ya albarkace su da ’ya’ya maza biyu.
_______________
