‘Yan Bindiga Sun Yi Garkuwa Da Magidanci, Matarsa Da Jaririyarsu
_________
Wasu ‘yan bindiga sun kutsa gidan magidanci, Ahmad Abubakar Zakka, a Kaduna, suka kama shi da matarsa da ƙanƙaniyar jaririyarsu, suka yi garkuwa da su kuma suka buƙaci a biya su Naira miliyan 30 kafin su sako su.
Kamar yadda magidancin yake bayani a wani faifan bidiyo da ‘yan bihdigar suka yaɗa a intanet, Ahmad Zakka ya ce, ‘yan bindigar sun fasa gidansa ne da ke Millennium City Kaduna da misalin ƙarfe 12 na daren Litinin ta makon jiya.
A faifan bidiyon, an nuno magidancin ɗauke da jaririyarsa, wacce ko riga babu a jikinta. Matarsa tana kusa da shi, a yayin da wani ɗan bindiga ke nuna su da bakin bindiga.
A yayin da Ahmad yake magana cikin makyarkyatar sanyi, hannunsa na dama a kumbure yake. Ya ce, “muna roƙon al’umma da su taimaka mana, Naira miliyan 300 ake buƙata, domin a sako mu.”
A bidiyon, yana tare da matarsa, wacce babu abin da take faɗa sai “inna lillahi wa inna ilaihi raji’un.”
Babu shakka ya kamata Gwamnan Jihar Kaduna, Malam Uba Sani ya yi hanzarin ɗaukar matakan da suka dace, domin ceto waɗannan iyali, ko don tausayin wannan jaririya da ke cikin wannan ibtila’i.
__________
