RANAR HAUSA TA DUNIYA
~~~~~~~
Madalla da wannan rana gagaruma,
Ran da Hausawa kan antayo hidima,
Murnar ta kam ba mu bar ta ba.
Related posts
Hausawa na Tanko duk mun jinjina,
Harshenku mai fiƙira mara majina,
Maganarsa ni ba zan bar ta ba.
Kakkarya kalma ka cin mata lalama,
Koko ka rarrashi reshen ƙwalama,
Dabgen tubani daɗi ba a kai shi ba.
Harshenmu shi ne kwarjini ‘yan uwa,
Mu riƙe kar mu saki ai mana wawa,
Gadon gida atubau ba ma bar shi ba.
Kayan aro ka sani ba zai tanyo ka ba,
Ranar da mai shi ya amsa ba toƙabo,
Kunya a ranar ba za ta bar ka ba.
Ni dai ina tutiya da harshen nan gida,
Har ma dawa inda take kwanci gada,
Hausa jiddun ƙaunar ki ba zan bari ba.
Allahu ƙaro muhibba ƙaro ɗaukaka,
Hausa jimla da duk Hausawa duka,
Su zam shahara ba da jinkiri ba.
~~~~~~~
© Bashir Yahuza Malumfashi
Laraba 06-01-1442 (Hijriyya)
26-08-2020 (Miladiyya)
~~~~~~~
