2027: SABUWAR GUGUWAR SAUYIN SIYASA A KANO
Daga Bashir Yahuza Malumfashi
__________
Wata majiya mai ƙarfi daga Kano ta sanar da ni cewa Injiniya Dr. Rabi’u Musa Kwankwaso yana shirin tsayar da Sheikh Ibrahim Khalil (Starcom) a matsayin ɗan takarar Gwamnan Jihar Kano a kakar zaɓen 2027, idan Allah ya kai mu, a ƙarƙashin Jam’iyar NNPP; a yayin da Sheikh Ibrahim Daurawa zai yi masa mataimaki.
Idan haka ta faru, babu shakka za a ga wata irin guguwar sauyi a siyasar Kano, bisa la’akari da waɗannan:
• Al’ummar Kano suna matuƙar daraja Addinin Musulunci. Don haka za su maida hankali sosai a wannan zaɓi.
• Sheikh Ibrahim Khalil, malami ne wanda ake ganin yana da alaƙa da dukkan ƙungiyoyin Musulunci, tun daga Izala, Tijjaniyya da Ƙadiriyya. Ke nan akwai yiwuwar zai samu amincewar mabiya ƙungiyoyin duka.
• Sheikh Ibrahim Daurawa yana da matuƙar farin jini ga mata, musamman zawarawa saboda suna jin daɗin wa’azinsa. Ga shi kuma mata suna da matuƙar yawa da tasiri a wajen zaɓe. Ta nan ɓangaren, akwai yiwuwar NNPP za ta kwashi ƙuri’u masu yawa.
• Uwa-uba, Dokta Rabi’u Musa Kwankwaso yana da matuƙar tasiri a siyasar Jihar Kano. Akwai yiwuwar Kwankwasiyya za ta ƙara ƙarfi sosai sanadiyyar waɗannan ‘yan takara, waɗanda dukkansu manyan malamai ne.
• Akwai yiwuwar al’ummar Jihar Kano za su tausaya wa Kwankwaso, bisa la’akari da suna da fahimtar cewa Gwamna Abba Kabir Yusuf kamar ya ci amanarsa, yadda ya canja sheƙa zuwa APC.
• To, amma ku jama’a, idan wannan shiri ya tabbata, yaya kuke kallon lamarin zai kaya? Ku bayyana ra’ayinku a Comment Section:
👇👇👇
__________
