Sojoji Sun Ƙwato Muggan Makamai A Jihar Taraba
Daga Bashir Yahuza Malumfashi
__________
Sojojin Operation WHIRL STROKE (OPWS) sun samu gagarumar nasarar ƙwato tarin makamai da harsasai daga maɓoyar wasu muggan masu aikata manyan laifuka a Ƙaramar Hukumar Takum, Jihar Taraba.
A wata sanarwa daga Muƙaddashin Jami’in Yaɗa Labarai na Hedkwatar Operation Whirl Stroke, Laftanar Ahmad Zubairu Zubairu ya bayyana cewa, jami’an sun gudanar da wannan aiki ne a ranar 04 ga Janairu, 2026, bayan samun ingantattun bayanan sirri game da wani shahararren shugaban masu laifi, John Ngata. Sojojin sun kafa shingen bincike a Zaki-Biam, inda suka samu nasarar tare wata matar da ake zargi.
Bayan an yi wa matar da ake zargin tambayoyi, ta jagoranci sojojin zuwa wata maɓoya, inda suka gano rumbun makamai da ƙungiyar masu laifin suka ɓoye a Ƙauyen Amadu, cikin Ƙaramar Hukumar Takum. Binciken ya kai ga ƙwato tarin makamai masu yawa da suka haɗa da bindigogin AK-47 guda 13 da gwangwanin alburusan bindiga (magazines) na AK-47 guda 39 da alburusai masu tsawon kilomita 7.62 guda 690 da kuma gurneti guda 4.
Kwamandan Rundunar Haɗin Gwiwa ta Operation WHIRL STROKE, Manjo Janar Moses Gara, ya yaba wa sojojin bisa ƙwarewarsu, saurin ɗaukar mataki da kuma yadda suka yi amfani da bayanan leƙen asiri yadda ya kamata, lamarin da ya kai ga katse hanyar samar wa masu laifi makamai da kuma ƙwato makamai masu haɗari.
Ya sake jaddada ƙudurinsa na ci gaba da ƙarfafa gwiwar sojoji ta hanyar ba da fifiko ga walwalar su, tallafin kayan aiki da kuma shirin ko-ta-kwana na aiki. Haka kuma, ya gode wa al’umma bisa ci gaba da bayar da haɗin kai da kuma sahihan bayanai, yana mai jaddada cewa goyon bayan jama’a na da matuƙar muhimmanci wajen yaƙi da aikata laifuka a yankin.
Ya ƙarfafa gwiwar mazauna yankin da su ci gaba da bai wa jami’an tsaro bayanai cikin lokaci kuma masu amfani, yana ba su tabbacin tsare sirri da ɗaukar mataki cikin gaggawa, domin Operation WHIRL STROKE ta ƙuduri aniyar tabbatar da zaman lafiya, kwanciyar hankali da kare rayuka da dukiyoyin jama’a a duk yankin da take aikinta.
__________
