Aiki Ya Fi Surutu: Muhimmin Darasi Ga Duk Mai Neman Nasara
Daga Bashir Yahuza Malumfashi
Related posts
•••••••
A wannan shafi na Sinadarin Rayuwa, a yau za mu maida hankali ne wajen bayyana muhimmancin da ke tattare da aiki. Ke nan, maimakon da muke yawan surutu, muna cewa “zan yi kaza” ko kuma “ya kamata in yi kaza da kaza…” kamata ya yi mu maida hankali kacokan wajen aikata abin da muka ƙudurta.
A rayuwa, magana ba ta canza komai sai an aiwatar. Mutum na iya yin shiri ko yin shela ko yin alƙawari amma abin da ke haifar da canji shi ne aiki. Idan mutum ya mai da hankali ga yin aiki fiye da yin surutu, zai ga canje-canje a hankali suna bayyana a rayuwarsa. Wannan ƙa’ida ce da ta tabbata a tarihin duniya. Har kullum masu yin aiki ne suke cin moriyar nasara, ba masu hayaniya ko surutu kamar kanari ba.
Na farko, domin mutum ya samu nasara, dole ya ɗauki mataki kan duk wani abu da yake da burin cin mawa. Manyan buƙatun rayuwa ko burace-burace, ba su cika ta hanyar magana kaɗai. Dole ne sai mutum ya tashi, ya saka himma, ya yi ɗawainiya, ya nuna juriya da dagewa.
Mutum ya kasance mai yin ƙoƙarin aikata wani abu a kullum, ko da ƙanana ne, da haka ake samun nasara sannu a hankali. Masu iya magana ma sun ce, da tsattsafi gulbi yake cika. Mutumin da bai tsaya ya yi surutu ba, sai dai ya natsu ya yi abin da ya dace, shi yakan fi samun sakamako.
Na biyu, sarrafa ƙudurori a aikace na buƙatar tsari da bin matakai, kamar dai yadda magini yake bin tsarin gininsa mataki-mataki. Abu na farko shi ne, ka rubuta burin da kake so ka cin mawa, ka rarraba su zuwa ƙananan matakai, sannan ka ɗauki matakin aikatawa a kai a kullum.
Idan ka bar burinka a zuciya kawai kuma ka ƙi binsa da aiki, to hakan bai isa ba. Kafin ka samu nasarar cika wannan buri, dole ka yi ƙoƙari a zahiri. Da zarar ka saba da yin aiki kullum, babu abin da zai hana ƙudurinka ko burinka ya cika. Daga ƙaramin aiki, sai ya girma a hankali, har ya zama babba. Daga nan nasara za ta samu, wadda za ka yi alfahari da ita.
Na uku, ya kamata ka san cewa nasara ba ta zuwa da sauri. Ita nasara sakamakon aiki ne da ke taruwa na tsawon lokaci. Aikin da aka ɗauki lokaci ana yi ba tare da gajiyawa ba. Mutum ya kamata ya ɗauki aikinsa da muhimmanci kuma bisa tsari. Misali, kamar noman gona, sai a fara da shara, sai huɗa, sai shuka. Daga nan kuma sai noma, zuba taki da sauran ɗawainiya har zuwa girbi.
Haka kuma, akwai abin lura dangane da kowane aiki. Mutum kan fuskanci ƙalubale, a duk lokacin da yake haƙilon cika burinsa. Wani lokacin mutum kan ji kamar ya gaji, ya ji kamar ma ya watsar da aikin da ya faro. Amma idan mutum ya dage, ya jajirce da haƙuri, sai ya ga nasara.
Muhimman masana falsafar rayuwa da dama sun yi magana kan muhimmancin aiki fiye da magana. Fitaccen masanin falsafa Thomas Carlyle ya taɓa cewa: “Burin da ya fi dacewa da ɗan adam shi ne aiki, ba tunani ko surutu kaɗai ba.” Wannan shi ke ƙara tabbatar mana da cewa aiki shi ne ginshiƙin duk wata nasara da mutum ke son samu a rayuwa.
Ya kai ɗan uwa, ka sani, aiki ya fi surutu, domin surutu ba ya ƙirƙirar sakamako amma aiki yana iya sauya rayuwa gaba ɗaya.
_______________
