A Rayuwa: Alheri Danƙo Ne
Daga Yawale Musa Kallah
•••••••
Ya kai ɗan uwa, ka aikata alheri a wannan ƙanƙanuwar rayuwa ta duniya, domin ka ga alheri.
Haƙiƙa ina tunatar jama’a cewa, duk wanda ya nemi alfarma a wurinka kuma kana da halin yi masa, to ka taimake shi.
Mai mulki ne kai, mai dukiya ne kai, ɗan siyasa ne kai, mai ilmi ne, mai sarauta ne, ɗan kasuwa ko talaka ne kai, duk wanda ya nemi alfarma a wurinka kuma akwai; to kawai ka yi masa. Masu hikimar magana sun ce, alheri danƙo ne, ba ya faɗuwa ƙasa banza.
Rayuwa da kake ganin ta akwai darasi cikinta. Mutum zai iya neman alfarma a wurinka kuma ka ƙi yi masa, alhali kana da dama, sai ka ga Allah ya maida damar ga wanda ka ƙi ka taimaka.
Yau ɗin nan na ga ikon Allah, a wajen wani bawan Allah da ya taimaki wani. A yanzu bai da dama, ta koma kan wanda ya taimaka. Ganin haka ya sanya shi ma a yau ya kyautata masa, ya sanya shi cikin farin ciki maras misal.
Ya Allah ka bavmu ikon taimakon junanmu kuma ka ba mu ladar haka, amin ya Allah!
________________
