Jinjina Da Yabo Ga Nagartaccen Shugaba: Malam Labiru Musa Ƙafur, mni
Daga Bashir Yahuza Malumfashi
_______________
A yau muna taya murna da fatan alheri bisa rayuwar haziƙi, ɗan ƙasa, malami, kuma gogaggen ma’aikaci; Malam Labiru Musa Ƙafur, mni, wanda a yau ce daidai da ranar haihuwarsa.
An haifi Malam Labiru a ranar 28 ga Oktoba, 1954, a Ƙafur, Jihar Katsina. Rayuwarsa ta kasance abin koyi ga kowa. Ya kasance malamin makaranta mai jajircewa, har zuwa inda ya zama Babban Sakatare. Daga bisani kuma ya zama mamba na Cibiyar Nazarin Hikima da Dabaru ta Ƙasa (mni). Tarihinsa ya zama haske da ƙwarin gwiwa ga matasa da tsofaffi.
Malam Labiru ya fara karatunsa a Ƙafur Primary School (1961–1967), daga nan ya wuce Government Secondary School, Malumfashi (1968–1972). Sha’awarsa ta ilimi ta kai shi School of Basic Studies, Jami’ar Ahmadu Bello, Zaria (1973–1974), inda daga bisani ya sami digirin BA da M.Ed. Domin ƙara ƙwarewa a harkokin gudanarwa, ya halarci Administrative Staff College of Nigeria, Badagry (1991), sannan daga baya ya halarci National Institute for Policy and Strategic Studies, Kuru, Jos (1998), inda aka ba shi lambar girmamawa ta mni.
A rayuwar aiki, Alhaji Labiru Musa Ƙafur ya shahara wajen nuna ƙwazo, gaskiya da sadaukarwa. Ya fara aiki a matsayin malamin makaranta, sannan ya zama Senior Deputy Registrar (Academic) a Katsina Polytechnic (1986–1989). Daga nan ya riƙe muƙamai da dama a ƙananan hukumomi da ma’aikatun gwamnati, inda ya kasance Kantoma na Ƙaramar Hukumar Kurfi (1992), kuma daga baya ya zama Babban Sakatare (Permanent Secretary) a ma’aikatun Bayanai, Kuɗi Kasuwanci, kafin ya koma Ma’aikatar Kula da Ma’aikata (Civil Service Commission). Malam Labiru, shi ne Wazirin Ɗangaladiman Katsina.
A rayuwarsa, Allah ya yi wa Malam Kabiru baiwa da yawa. Yana da hali nagari da dabi’u masu kyau. Abokan aikinsa suna bayyana shi a matsayin mutum mai tawali’u, natsuwa, da sauƙin kai. Ba ya jagoranci cikin izza da ɗagawa, sai dai da shi shugaba ne mai nuna misali cikin nagarta da ƙwarewa. Dalili ke nan ake girmama shi, domin shi mutum ne mai hikima kuma mai adalci. Mutum ne da yake sauraron kowa cikin nutsuwa, abin da ke nuna zurfin tunani da basirar jagoranci.
Malam Labiru mutum ne mai tsoron Allah kuma mai ibada. Yana rayuwa cikin gaskiya da biyayya ga ƙa’idojin addini. Al’umma suna ganin shi a matsayin mai aminci kuma amintacce, wanda bai cika surutu da hayaniya ba. Duk da manyan muƙamansa, bai taɓa nuna girman kai ba; yana mu’amala da kowa da mutunci da tausayi. Shi mutum ne mai yawan taimako da kyauta, yana tallafa wa marasa ƙarfi da masu buƙata ba tare da neman yabo ba.
A matsayinsa na Matallafin Ƙungiyar Cigaban Ƙafur (Kafur Development Union), Malam Labiru ya sadaukar da lokacinsa da dukiyarsa wajen bunƙasa garinsu da taimakon jama’arsa. Son da yake yi wa ci gaban al’umma, ilimi, da ɗorewar matasa yana nuna cewa a wurinsa, jagoranci ba muƙami ba ne kawai, aiki ne na amana da kulawa. Ta hannunsa, mutane da dama sun sami shiriya da nasara a rayuwa.
A wannan rana mai albarka, muna taya shi murna tare da iyalansa, abokansa, da jama’ar Katsina baki ɗaya. Allah Ya ƙara masa lafiya, hikima, amibci da tsawon rai mai albarka. Rayuwarsa tana tuna mana cewa girma na gaskiya ba a cikin kuɗi ko iko yake ba, yana cikin yin hidima ga mutane da gaskiya, tausayi da tawali’u. Barka da zagayowar ranar haihuwa, Malam Labiru Musa Ƙafur, mni!
________________
